چاغی، جمعیت علماء اسلام نا خواست آ مچ آ ضلع ٹی شٹر ڈاؤن ہڑتال
چاغی، جمعیت علماء اسلام نا صوبائی فیصلہ نا رِد اٹ 19 نومبر آ ضلع چاغی ٹی پورو شٹر ڈاؤن ہڑتال کننگا‘ ہرانا بلوچستان نیشنل پارٹی (مینگل) و نیشنل پارٹی ہم مخ تفی نا پڑو کریسر۔ جمعیت علماء اسلام ضلع چاغی نا کنڈ آن صوبائی سرکڑدہ غاتا پارت آ ہڑتال نا کال تننگاسس۔ برانز نا مسخت بلوچستان نا نہادی معدنی وسیلہ غاتا رکھ، مائنز اینڈ منرلز تون تعلقدار پاننگوک الس دشمن پالیسی، صوبہ ٹی خرابی نا کنڈ آ ہنوک آ امن ایمنی نا حالیت و الس ءِ مون تروک بنداوی ویل آتا برخلاف توار چست کننگ ءِ۔ ہڑتال نا کال آ دالبندین تون اوار ضلع چاغی نا چندی علاقہ غاتیٹی کل واپاری ہند آک بند ئسر‘ ہرانا سوب آن واپاری سرجز آک سلیسر۔ جے یو آئی نا ضلعی امیر مولانا صالح محمد حقانی، تحصیل امیر سید ہاشم آغا، ضلعی ترجمان حافظ علی محمد بڑیچ و ایلو کارندہ غاک شار اٹی گشت کرسا ہڑتال نا چاروکی ءِ کریر۔