بلوچستان اسمبلی ٹی وزیراعلیٰ جام کمال نا برخلاف بے پتی نا تحریک پیش
Get real time updates directly on you device, subscribe now.
کوئٹہ (مانیٹرنگ ڈیسک) بلوچستان اسمبلی نا دیوان اسپیکر میر عبدالقدوس بزنجو نا کماشی ٹی بنا کرے‘ ہراٹی وزیراعلیٰ جام کمال نا برخلاف بے پتی نا تحریک ءِ پیش کننگا‘ اسمبلی نا باسک سردار عبدالرحمان کھیتران وزیراعلیٰ نا برخلاف بے پتی ناتحریک ءِ پیش کرے‘ دا وخت آ سردار عبدالرحمان کھیتران پارے کہ وزیراعلیٰ نا خراب حکمرانی نا سوب آن نااومیتی‘ بے ایمنی‘بے روزگاری زیات مسنے‘ ادارہ غاتا کارکڑد زہمی مسنے‘ او تینے عقل کُل تکسا اہم انگا باندات آتے سلابت آن بیدس چلیفنگ اٹی ءِ۔ سردار عبدالرحمان کھیتران پارے کہ اہم انگا باندات آتے بے سلابت آن چلیفنگ آن صوبہ بے کچ نسخانی کننگا‘ وزیراعلیٰ جام کمال خان تینا وڑ اٹ صوبہ نا باندات آتے چلیفنگ اٹی ءِ‘ خواست کینہ کہ خراب کارکڑد آن وزیراعلیٰ ءِ عہدہ غان اینک کننگے‘یات سلے کہ جام کمال ءِ عہدہ غان اینک کننگ کن اپوزیشن تون اوار حکومتی باسک آک ہم اونا برخلاف مسنو‘ وخت اس کہ جام کمال خان پیدوار وڑاٹ پارینے کہ او استیفہ تفک۔ ایلو کنڈآ بلوچستان اسمبلی ٹی قائد حزب اختلاف ملک سکندر دعویٰ کرینے کہ ایوان آن اسمبلی نا 5 باسک بے گوا ءُ۔ بلوچستان اسمبلی نا دیوان اسپیکر میر عبدالقدوس بزنجو نا کماشی ٹی بنا کرینے دیوان اٹ وزیراعلیٰ جام کمال نا برخلاف بے پتی نا تحریک ءِ پیش کننگا۔ بے پتی ناتحریک نا ءِ پیش کننگ آن پد تینا تران اٹ بلوچستان اسمبلی ٹی قائد حزب اختلاف ملک سکندر دعویٰ کرے کہ ننے کل ءِ ایوان نا تقدس ءِ بحال کروئی ءِ‘ ایوان آن اسمبلی نا پنچ باسک مسنگ یا دزگیر ءُ‘ او پارے کہ پنچ باسک مسنگ ءُ کل ءِ آئینی و جمہوری حق کاریم اٹ اتنگ نابایدے موکل مرے۔ قائد حزب اختلاف ملک سکندر اسپیکر آن مسنگ باسک آتے ایوان اٹ اتنگ نا پرمان کننگ نا خواست کرے۔