پرائیویٹ ہسپتال اٹ درمان نا بابت کانودی کسر دوئی کننگک،، عطاء تارڑ

اسلام آباد، بنجائی وزیر حوالکاری وشینکاری عطاء اللہ تارڑ پارینے کہ بانی پی ٹی آئی نا درمان نا بابت ہچ ءُ اُم اس اف، اودے مہالو آنبار جیل مینوئل نا رِداٹ جانجوڑی و درمان نا آسراتی دوئی مریک۔ سپریم کورٹ نا داسہ نا فیصلہ غا اولسر جاچ انا درخواست دائر کننگک خاص وڑ اٹ پرائیویٹ ہسپتال اٹی درمان نا باندات آ کانودی کسر دوئی کننگک۔ وزیر مملکت داخلہ باندات طلال چوہدری تون اوار میڈیا تون ہیت وگپ کرسا عطاء اللہ تارڑ پارے کہ مسلم لیگ (ن) ہچ گہس کس اسے نا جانجوڑی نا باندات آ سیاست کتو، ولے تاریخ شاہد ءِ کہ پی ٹی آئی نا کنڈ آن مسلم لیگ (ن) نا سرکڑدہ نا جانجوڑی ءِ سیاسی شرہ نا بشخ جوڑ کننگا۔ بانی پی ٹی آئی تینٹ ہم سیاسی جلسہ و بیان تیٹی جانجوڑی نا بابت جتا جتا باندات آتا حوالہ ترسا کرینے‘ وخت اس کہ مسلم لیگ (ن) نا سرکڑدہ غاک ہچ گہس اوفتا جانجوڑی نا بابت سیاست کتنو۔ بنجائی وزیر پیدوار کرے کہ ہر بندی نا حق ءِ کہ اودے آئین و کانود نا رِداٹ جانجوڑی نا آسراتی فراوان کننگے۔ بانی پی ٹی آئی ءِ داکان مست ہم طبی آسراتی فراوان کننگا و آخبت اٹی ہم اودے کانود و جیل مینوئل نا رِداٹ درمان نا آسراتی دوئی مریک۔ او پارے کہ درمان نا باندات آ ہچ ءُ وڑ اسے نا اُم اف۔ بندی تے جیل مینوئل نا رِداٹ طبی آسراتی فراوان کننگ ریاست نا زمواری ءِ و دا باندات اٹی کانودی خواست آتے پورو کننگ انگ ءِ۔ او پارے کہ پرائیویٹ ہسپتال اٹی درمان نا بابت سپریم کورٹ نا فیصلہ غا اولسرجاچ انا درخواست دائر کننگک تانکہ دا باندات کانودی وڑاٹ پیدوار مرے و دا ہم پک مرے کہ مگہ دا وڑ انا آسراتی نا حق کل بندی تے بریبر دوئی ءِ یا آخا۔ بنجائی وزیر پارے کہ جانجوڑی نا باندات ءِ بایدے سیاست آن جتا کننگے و دا باندات ءِ سیاسی رنگ تننگ نا استخواہی ہچ گہس پوروی مفک۔ او پارے کہ دا بنداوی وڑ اٹ اسہ کانودی باندات اسے‘ ہراڑا سیاست بایدے مف۔ او مستی پارے کہ حکومت بانی پی ٹی آئی تون اوار کل بندی تے آئین، کانود و جیل مینوئل نا رِداٹ المی طبی آسراتی فراوان کننگ کن زموار ءِ۔