اسرائیل نا شام انا ایئربیس آ بمباری، رن وے و اسٹوریج ءِ نسخان

اسرائیل قطب دے کی شام اٹی ساڑی ابو الظہور ملٹری ایئر بیس آ فضائی جلہو کرے ہرافتے ٹی رن وے و اسٹوریج میرات آتے شست کننگا۔ شام انا سرکاری ٹی وی چینل الاخباریہ اسہ فوجی ذریعہ سے نا حوالہ اٹ پارے کہ اسرائیل قطب دیکی شام اٹی حلب انا خڑک آ ساڑی ابو الظہور ایئربیس نا رن وے و اسٹوریج میرات آتیا ہشت فضائی جلہو کرے۔ درملکی حوالکاری ادارہ نا رِداٹ اسہ فوجی ذریعہ و اڈہ نا خڑک رہینگوک اسہ شاری اسے نا رِداٹ دا جلہو آتیٹی ہچ ءُ جانی نسخان اس متو۔ عرب میڈیا نا رِداٹ اسرائیلی جلہو آن مست اسہ ترک فوجی ڈل اس رن ویز نا بحالی نا کاریم نا بنا کن دا ایئربیس نا دورہ ءِ کریسس۔ جلہو نا وخت آن ہندن لگک کہ اسرائیلی جلہو شام انا عسکری لائخی تا بحالی نا بابت ترکیہ ءِ کلہو رسیفنگ کن ئس۔ ترک سیم آن کساس 70 کلومیٹر مُر ساڑی دا ایئربیس 2013ء آن غیر فعال ئس و شام انا 14 سال انا جھیڑہ نا وخت آ وخت اس مسکوہی ا صدر بشار الاسد نا وفادار فورس و وخت اس اپوزیشن ٹولی تا کوزہ ٹی مرسا کرینے‘ داکان بیدس شام و عراق کن امریکہ نا خصوصی صدارتی ایلچی ٹام بیرک پارے کہ ابوالظہور ملٹری ایئربیس آ اسرائیلی فضائی جلہو سٹی و خار تس ءِ‘ ہراڑان ڈیہہ اٹ سوگوی ءِ ہچ ءُ فائدہ اس ملپک۔ امریکہ ءِ دا جلہو تیا گڑتی ءِ۔ داکان بیدس ترکیہ ابوالظہور فوجی ایئربیس آ اسرائیلی فضائی جلہو آتا مذمت ءِ کرسا جہانی برادری آن گام ہرفنگ نا خواست کرینے۔ ترک وزارتِ خارجہ پارینے کہ اسرائیلی جلہو شام انا علاقائی سالمیت نا خلاف ورزی ءِ‘ جہانی برادری شام انا برخلاف اسرائیلی بیدادی ٹی ودکی آ فیصلہ کروک موقف تینائی کے۔