شڑت آک پورو ءُ، آئی ایم ایف سٹی تَل وَل کننگءِ، وزیر اعظم

اسلام آباد: وزیراعظم محمد شہباز شریف پارینے کہ کہ آئی ایم ایف نا شڑت آتا پوروی آن پد ہم معاہدہ سٹی پد بٹنگ انگ ءِ۔ ولے چین اسہ وار ولدا ننا ریسکیو کن مونی بسنے، چین آن بیدس ننا عظیم سنگت سعودی عرب، متحدہ عرب امارات و قطر پاکستان نا کمک ءِ کریر۔ اوپارے کہ1200 میگاواٹ نا چشمہ فائیو نیوکلیئر پاور پلانٹ معاہدہ پاک چین سنگتی ٹی اسہ پین مزل نا نشان اسے، مشکل زرگزرانی حالیت آتیان پد ہم پاکستان زرگزرانی بحالی کن سنبرینگوک ءِ، چین نا کنڈآن 3 ارب 48 کروڑ ڈالر نا زرکاری مثبت ءُ گام اسے، آئی ایم ایف تون معاہدہ پد تمنگ آن پد چین ننا کمک ءِ کرے، چشمہ فائیو ڈٹ سول و فوجی سرکڑدہ غاتا اسہ پنہ غا مننگ نا شاہدی ءِ،قوم ءِ دا معاہدہ غا مبارکبادی ایتیوہ۔ سے شنبے نادے آ 1200 میگاواٹ نا چشمہ فائیو جوہری بجلی گھر نا تفنگ نا مفاہمتی یات داشت آ دستخط نا دود اس اڈ ہلک۔ دا دود اٹی وزیراعظم نا ساڑی گری ٹی چین نا نیشنل نیوکلیئر کارپوریشن و پاکستان اٹامک انرجی کمیشن نا نیام اٹ مفاہمت نا یات داشت آ دستخط کننگا۔ داوخت آ بنجائی وزیر سینیٹر محمد اسحاق ڈار، احسن اقبال، خرم دستگیرآن بیدس چینی کمامدارآک ہم ساڑی ئسر۔ داوخت آ دود آن تران کرسا وزیراعظم پارے کہ ای اینو قوم ءِ مبارکبادی ایتیوہ کہ اینو سی فائیو جوہری توانائی ڈٹ انا تفنگ نا مفاہمت آ دستخط مسنے، دا ڈٹ آن 1200 میگاواٹ بجلی دوئی مریک، دا ڈٹ میاں نواز شریف نا دور اٹی خلنگ نا اصولی فیصلہ مسوسس، دانا شڑت آک مسوسر۔ تدوک آ حکومت دا ڈٹ ءِ سرد خانہ ٹی شاغاسس، داسہ دا ڈٹ ءِ ایسر اسکان سرکننگ کن مفاہمت نا یات داشت آ دستخط مسنے۔ دا ڈٹ آ خڑچ 2017نا ہی تخنگانے ہراڑان 30 ارب روپئی نا بچت مریک۔ احسن اقبال، خرم دستگیر و پاکستان نا پوسکن آ عسکری سرکڑدہ غاتا منت وار اُن کہ او داڑا بھاز خواری کریر و است خواہی ہلکر، چشمہ فائیو ڈٹ سول و فوجی سرکڑدہ غاتا اسہ پنہ غا مننگ نا شاہدی ءِ۔ وزیراعظم پارے کہ سی فائیو ڈٹ پاکستان و چین نا نیام اٹ اقتصادی کمکاری نا بے مٹ ءُ درور اسے، منہ تُو مست کراچی ٹی کے تھری نا بناءِ کرین، اینو سی فائیو نا بنداو ءِ تخنگ اُن، اومیت ءِ کہ بیدس تاخیر آن دا ڈٹ ءِ مون آ دینہ، مشکل زرگزرانی حالیت آتیٹی چین نا کنڈآن 3.48 بلین ڈالر نا دا ڈٹ اٹی زرکاری پیدوار کلہو ءِ کہ پاکستان اسہ ہندن ءُ ہند اسے ہراڑے چینی کمپنی و زرکارآک چرجوئی اتون پاکستان آ پت انا درشانی ءِ کننگ اٹی ءُ، دا اونا ڈیک ءِ کہ ننا سنگتی ہمالیہ غان بڑز، سمندر آن کڑمب، شاد آن ہنکین و فولاد آن سوگو ءِ۔ اوپارے کہ چینی صدر شی جن پنگ دا سنگتی ءِ این ایلمی نا پن ءِ تسنے، پاکستان ءِ اقتصادی مشکل آتا مون تروک ئسک و نویں ریویوکن آئی ایم ایف تون گپ وتران مسکہ، آئی ایم ایف نا کنڈآن ہراشڑت آتے عائد کننگا اوغٹ ءِ نن پورو کرین اوکان پد ہم اوٹی بھلو تاخیر اس کننگا، چین اسہ وار ولدا ننا کمک ءِ کرے، دا سنگتی ہمو ضرب المثل نا اسہ عمدہ ءُ درور اسے کہ”سنگت ہمو ہرا مشکل وخت اٹی کاریم برے“۔ وزیراعظم پارے کہ چین آن بیدس ننا عظیم سنگت سعودی عرب، متحدہ عرب امارات و قطر پاکستان نا کمک ءِ کریر و داسہ ہم کننگ ءُ، دا مشکل وخت اٹی چین نا مالی کمک اہم ءِ داڑا چینی صدر شی جن پنگ و اونا ٹیم انا منت وار اُن۔ اووزیرخزانہ اسحاق ڈار و اونا ٹیم انا دامعاہدہ کن دے و نن کوشست آتیا اوفتا منت واری ءِ ہرفے، چین ناظم الامور و ایلوفتا ہم منت واری ءِ ہرفے۔ اوپارے کہ دا میاں نواز شریف نا وژن ءِ، او1993 ٹی اولیکو وار چین اتون جوہری توانائی نا معاہدہ ءِ کریسس۔ اوپارے کہ چینی سرکڑدہ غاک پاکستان نا ہرا بے مثل کمک ءِ کرینو و وام تے پوسکن کرینو دا بے مثل سنگتی نا جوان ءُ وڑ اسے، چین پاکستان نا ہمو باپت سنگت آتیٹی اوار ءِ ہرا مدام مشکل وخت اٹی پاکستان تون سلیسنو۔ دے ٹک نیامی ٹی سعودی عرب، متحدہ عرب امارات، قطر وکویت ننا کمک ءِ کریر، نن سنگت آتا کمک و کمکاری ءِ اسُل است آن دپنہ۔

(اے پی پی)