دہشتگردی تور عدالت آن چیئرمین پی ٹی آئی نا دزگیری وارنٹ جاری

لاہور : لاہور نا دہشت گردی تور عدالت پاکستان تحریک انصاف (پی ٹی آئی) نا چیئرمین عمران خان نا ناقابل ضمانت دزگیری وارنٹ جاری کرے‘ دہشت گردی تور عدالت نا پرسجوا فسر نا خواست آ ناقابل ضمانت دزگیری وارنٹ کننگا۔ پرسجو افسر عدالت ءِ پارے کہ دوبہ دار آتے دزگیر کننگ ناکوشست کننگا ولے دزگیری مننگ کتو۔ عدالت چیئرمین پی ٹی آئی نا ناقابل ضمانت دزگیری وارنٹ جاری کرے‘ داڑتون اوار حماد اظہر، میاں اسلم اقبال وایلوفتا ہم دزگیری وارنٹ جاری کننگانے‘ دوبہ دار آتا برخلاف تھانہ نصیر آباد اٹ کنٹینر خاخر تننگ و تھانہ ماڈل ٹاؤن اٹ ن لیگ نا دفتر آ جلہو نا کیس درج ءِ‘ یات سلے کہ تدوک آ تُو پاکستان تحریک انصاف نا چیئرمین عمران خان نا دزگیری آن پد پی ٹی آئی نا کارندہ غاک ملک انا چندی شار تے ٹی برانز و پرغ وبٹ کریسر‘ پی ٹی آئی ناکاندہ غاک جناح ہاؤس لاہور تون اوار فوجی ملکیت‘ تاریخی ماڑی‘ سرکاری میرات و گاڈی تے خاخر تسوسر و پاک فوج 9 مئی ءِ تہار دے گونداسس۔ داکان گڈ آرمی چیف جنرل عاصم منیر ناکماشی ٹی خصوصی کور کمانڈرز کانفرنس اٹ فوجی ملکیت آتیا جلہو کروک دوبہ دار آتا برخلاف آرمی ایکٹ و آفیشل سیکرٹ ایکٹ انا رد اٹ ٹرائل نافیصلہ کننگاسس و قومی سلامتی کمیٹی دا فیصلہ ءِ پک کریسس۔ ایلو کنڈ آ 9 مئی نا ہڑدڑ نا مقدمہ ٹی ضمانت مسترد مننگ آ پی ٹی آئی راہشون شاہ محمود قریشی و اسد عمر ایچ ایٹ کچہری آن نرار‘ حوال نا رد اٹ ڈسٹرکٹ اینڈ سیشن کورٹ اٹ تحریک انصاف نا راہشون شاہ محمود قریشی و اسد عمر نا برخلاف تھانہ ترنول اٹ درج مروک مقدمہ ٹی ضمانت نا درخواست آتا سماعت مس۔ ایڈیشنل سیشن جج طاہر عباس سپرا درخواست آتیا ڈک کروک فیصلہ ءِ بنفسا اسد عمر، اسد قیصر و شاہ محمود قریشی نا ضمانت نا درخواست آتے خارج کرے‘ ہرمسٹ آ راہشونک عدالت نا درگہ غا سلسا فیصلہ ءِ بنگر‘ ہندن کہ ضمانت نا درخواست آک خارج مسر ہر مسٹ آ راہشونک بھلو گام ہرفسا اسہ گاڈی ٹی تولسر و ایف ایٹ کچہری آن نرار۔ فواد چوہدری نا عدالت آن نرنگ نا ویڈیو سوشل میڈیا غا وائرل مننگ آن پد اسد عمر، اسد قیصر و شاہ محمود قریشی نا ہم عدالت آن نرنگ نا ویڈیو سوشل میڈیا غا وائرل مسنے۔

/ اسلام آباد(مانیٹرنگ ڈیسک/ اے پی پی)