مگہ سیاست بد ءِ……؟

انسانی راج انا بھلا جوانی دادے کہ دانا ہر ساہت و ہر خواری کن گدرینگوک آ وخت انا پامدار یا فلسفیک تینا پاروک آ ہیت و عمل اٹ اودے آسان جوڑ کرینو۔ اوفک انسا ن نا راہشون و رغاموک مسنو۔ اینو نا انسانک ہراڑے ہمو ہیت و عمل آتے حقیقت نا دروشم تننگ اٹی ءُ، ہموڑے اینو نا انسان اینو نا دور و ضرورت آتے کن پوسکن ءُ قول، عمل و آزموندہ غاتے بروک آ انسان آتا مون آ تخنگ اٹی ءِ۔ ہراکہ پٹوک، ضرورت مند و طالبعلم آتے گام گام آخواننگ، بِننگ و عمل اٹ نظر بننگ کیرہ۔ اگہ نن دنیا و راج ءِ جوان انگا نظر، جوان انگا سوچ و عملی آ گام آتتون ہرن تو دن ءُ ہچ ءُ مشکل اس اف کہ اینو نا انسان نا زند اٹی ہر پارہ غا خرینی تا ساڑی مننگ تون اوار دادنیا و راج زیبدار خننگے و زیبدار مرے۔

دا رد اٹ ہر ملک، راج و قوم اسیٹی بھلا بھلا ویل و فیصلہ غاتے کن و راج ءِ ہر دور آنبار مون مستی گام خلنگ یکجائی، تپاکی و ایلم دوستی کن سیاست نا کڑدار آن نمن مننگ مفک۔ اگہ اینو ننا آزموندہ، خننگ، بننگ و بھلو کچ اس اسکان عمل اٹی سیاست ننے گندہ و جوان ءُ کڑدار اسیٹی نظر بفک، اوکان پد ہم راج اسیٹی سیاست و سیاسی نظریہ غاتیان مُر مننگ مفک۔ مننگ کیک اینو نا دورباری نا سیاست نا اندازہ ءِ خلسا پنی آ فلسفی ارسطو پاریسُس کہ:

”سیاست آن لاتعلق مننگ یا مُر مننگ نا مطلب دادے کہ کمتر آ بندغ آک حکمرانی کیر۔“

نئے بیرہ دا کہ سیاست آن مُری و لاتعلقی نا مطلب نزور آ فیصلہ کروک آ بندغ آک نا حکمران مریرہ، بلکہ زند اٹی گچین ءُ بدلی اس اتنگ نا عمل سلک، نزور مریک۔ اسہ کنڈ آ جدلیات نا کانود نا رد اٹ دنیا نا ہر گڑا اسُل کہ او ساہدار اسے، یا بے ساہ اسے۔ او ہر ساہت بدلی اسے آن گدرینگ انگ اٹی ءِ۔ دن کہ نہال ءِ کہ او رَغ خلیک بھلن مریک و میوہ ایتک ایلو کنڈ آ دیوال ءِ کہ وخت اتون اوار اونا حال بدل مریک۔ دا حال اٹی ہمو بدل مروک آ حالت اٹی اگہ نہال ءِ دیر تروک ءُ و دیوال ءِ لیو و رنگ کروک ءُ مف تو او کرار کرار تمک۔ و نہال کرار کرار آ بارسا کاہک۔ دا بدلی ءِ اگہ ایلو نظر اٹ ہرن تو اسہ کنڈ آ دا حوال رسینگ انگ اٹی ءِ کہ چین انا Spaceship نا کمک اٹ 6 تُو اکن انسانک خلا غا ہِننگ اٹی ءُ۔ انسانی راج ءِ بدل مروک آ حال اٹی کماش، سوچ، فکر مس تو اودنیا نا بڑزی تیا سر مریک۔

و اگہ سوچ و فکر مف توراج اٹی انسانی زند انا ہچ ءُ قدر و قیمت اس مفک۔ دا بدلی اسہ گچین ءُ بدلی اس مننگ نا جاگہ غا رد، بد و غلط مریک۔ اوغانستان آن حوال بننگ اٹی ءِ کہ مسیت اسیٹی اسہ خودکش جلہو اسیٹی 40 بندغ کسکنو۔ اگہ سیاست نا حوالہ اٹ ہیت مرے تو بلوچستان ءِ دا فخر دوئی ءِ کہ داڑے ہر وخت اسہ نہ اسہ جاگہ اسہ نہ اسہ ادارہ و اسہ نہ اسہ تنظیم اسے نا پارہ غان گچین و ضرورت نا رد اٹ راہشونی نا سیاست مرسا کرینے۔ ہراڑے اگہ ورنا یا پوسکن سیاست نا نہال آتا یعنی طالبعلم آتا راہشون آ تنظیم، ادارہ ساڑی ءُ کہ او آخبت کن بھاز آ گچین آ انقلابی و سیاستدان، پامدار ودی کرسا کرینو۔

اینو نا دور باری ٹی نن سیاست ءِ بد، رد و غلط خننہ تو دانا مطلب اسُل دا اف کہ اینو سیاست ختم مسنے، کسکنے یا گدرینگوک آ وخت انا ہیت اس جوڑ مسنے۔ بلکہ آخا، سیاست، سیاستدان و سیاسی کماش آتا ہچ ءُ کمبوتی اس اف۔ ہراڑے نن اینو تینا ہَد و اویل نا سیاستدان، راہشون و کماش آتا حالت و عمل ءِ خننگ کینہ ہموڑے مچ آ دنیا نا ملک، قوم و ہر راج اسینا سیاست و زند ننا مون آٹے۔ و دادے بیان کننگ کن سد آخا بلکن ہزار آ چینل، اخبار، ریڈیو و سوشل میڈیا نا وڑ تے نن خڑک آن خننگ اُن، و دانا بارواٹ جوان یا بد ءُ سوچ اس تخنگ کینہ۔

اینو اگہ دنیا ٹی ارب آ انسانک لنگڑی، غریبی و نیزگاری نا گواچی ءُ تو ارٹمیکو کنڈ آ ہنداخس انسان جوان ءُ زند اس گدریفنگ اٹی ءُ۔ ولے دانا مطلب اسُل دا اف کہ نیزگار آتا سنگت، دوست خوا و خیر خواہ کس اس اف۔ و ہرا انسانک جوان ءُ زند اس گدریفنگ اٹی ءُ اوفتے دشمن اف۔ اوفتا برخلاف کس مخ ءِ تفتنے۔ بلکن داڑے تول اٹی ہڑتوم آ پارہ غا گڑانہ گڑاس وزن ارے۔ ہراڑے دنیا نا ویل آتا گواچی آ بندغ آتے کن سوچ، فکر و عمل ساڑی ءِ ہموڑے ازگار آتے کن قدرت و انسان وڑ انا وڑ اسیٹ ویل ودی کننگ اٹی ءِ۔ ولے زیات اندازہ دادے کہ اینو نا دنیانا کم و وَد کل ملک و قوم آتیٹی نزور آ سرمایہ دارانہ وڑ و ڈول، نزور سیاسی گام گیج و محکوم تحریک یا جہد مفننگ نا سوب آن رد و بد آ حوال آک زیات بننگ اٹی ءُ، ہر پارہ غان ننے اسکان فریشان کروک آ حوال آک ملرہ۔ دانا سوب دادے کہ اینو راہشون و کماش اسہ کنڈ آ نظریاتی، فکری وبے عملی نا گواچی ءِ تو ایلو کنڈ آ ہر راج انا سیاسی پارٹی و کماش آتتون پہہ، پامدار آ بندغ آتا کمبوتی ءِ۔ ہر اسٹ اینو سیاست اٹی تینا جندی فائدہ و غرَز کن ءِ۔ ہرانا پد دادے کہ اینو سیاست مخلوق کن بد و گندہ جوڑ مسنے۔

ولے اگہ اسہ بندغ اس نظریاتی وڑ اٹ دنیا و دنیا نا معاملہ غاتے پہہ مریک تو او ہچ ءُ وڑ اسیٹ سیاست آن مُر مننگ کپک۔ بلکہ اونا ہر ساہت تینا راج و قوم انا شون و شرحالی کن سوچ، فکر و عمل اٹ گدرینگک۔ و مننگ ہم ہندا باید ءِ۔ اینو نا انسان اگہ تینا کڑدار ءِ اسہ سیاسی پارٹی یا تنظیم اسے تون سدھا گنڈپک تو باید ءِ کہ سیاست و سیاسی نظام نا گندئی و جوانی تے ضرور پہہ مرے۔ دروغ، جندی فائدہ ومخلوق ءِ رد شاغوک آ سیاست دان آتا ہیت و عمل آن اُست مونجا مف بلکہ مخلوق نا سیاست و دور انا گرج آتے کن پہہ مننگ بھاز المی ءِ۔ تاکہ زند انا ہر ساہت ویل و مونجائی نا جاگہ غا شادکامی و جوان ءُ عمل و فکر اسیٹی گدرینگے۔ و دنیا نا گندہ غا سیاست نا راستکی تے پہہ مرسا تینا سوچ و فکر اٹ اوفتے پدی اِلے و تینا جند انا مطالعہ، آزموندہ و فکر اٹ مون مُستی گام خلے۔

ہفتئی تلار
تاک:40
29-23 اکتوبر 2021ء
پنہ: 08