دستگیر صابر (برج ثور)

شاہین بارانزئی

0

Get real time updates directly on you device, subscribe now.

 

(نوٹ: براہوئی شاعر و ادیب آتا برج آتے چاہنگ کن اسہ سلسلہ اس شروع کننگانے۔ تانکہ اوفتا برج، پیدائشی عدد و مرکب عدد آتا چاہنگ آن پد اوفتا شاندار شخصیت، مزاج نا ترندی و سستی ءِ معلوم کرسا خوانوک آتے معلوم کرفنگ ءِ۔ ہر اسٹ آن دا اومیت کننگ ہم المی اف کہ دا سلسلہ ءِ پسند کیر۔ واہم کس اس اگہ تینا برج ءِ معلوم کننگ یا تینا خوانوک آتے معلومدار کرفنگ خواہک تو تینا پن و ودی دے ءِ اگہ مس تو اسہ فوٹو اس ہم دا نمبر آ 0315-4211666 آ ایس ایم ایس یا وٹس ایپ کے۔ منت وار)

پروفیسر غلام دستگیر صابرؔ ودی دے(13 مئی(1969ء) برج ”ثور“ (Taurus)، استار ”زہرہ“ (Venus)، تب ”خاکی“ (مِشی)، برج انا دروشم ”خراس نا ڈیک“، موافق تب برج آک ”سنبلہ، جدی“، تب آن چَپ برج آک ”اسد، عقرب، دلو“، بِسٹ اسہ تب نا برج آک ”حمل، جوزا“، بے تعلق برج آک ”میزان، قوس“، منطقہ البروج اٹی عدد ”2“، ہجی حرف آک ”ب، و“، ودی دے ئی عدد ”4“، مرکب عدد ”36“، لائف پاتھ عدد ”7“ ءِ۔

فلکیات نا چاہندار آتا رد اٹ برج ”ثور“ والا بندغ ذہین، محنتی، مستقل مزاج، متحمل مزاج، بھاز طاقتور، حسن و محبت نا دلدادہ مریک۔ دا برج (ثور) والا محفل کروک، تینے تنیائی آن بچفوک، جسمانی وڑ اٹ پرکشش، تینا کاریم ءِ اُست انا ہُب اٹ کروک مریک۔ تینا طب نا رد اٹ سوچ و فکر کروک، تینا خواہنداری تے جذباتی کیفیت اٹی پورو کننگ کن کوشست کروک، قوت برداشت اٹی حیرت انگیز، آزاد ماحول اس ملپننگ نا وڑ اٹ اخلاقی اصول آتیا کاربند سلوک مریک۔

برج ”ثور“ والا بندغ حالیت نا تیز و ترندی نا وخت آ تینا ہمت و حوصلہ ءِ بٹپک بلکہ تینا ذہنی بیداری نا وسیلہ اٹ حالیت آتتون مون ایتک۔ اعصاب شکنی آن مُرّ، حواس باختگی آن پاک مریک۔

پاننگ دا ہم ارے کہ برج ”ثور“ والا بندغ زور اٹ محبت نا خواہندار مفک، بلکہ حقیقی محبت نا خواہندار مریک۔ ہر وڑ انا ڈکھیائی تے سگک ولے تیناعزت نفس ءِ مجروح کپک۔ تینا بروک آ وخت اکن مدام کوشست اٹی مریک۔ بھاز غیرت مند و تینا زند ءِ تینٹ تینا خودداری نا کمک اٹ گدریفک۔

پروفیسر غلام دستگیر صابرکون انگا بندغ یعنی برج ”ثور“ والا بندغ تینا تب اٹی مَش آنبار سوگو، ارادہ نا پکا مریک۔ بے سہبی نا قائل مفک، تینا کسر نا مون اٹی بروک آ ہر وڑ انا اڑانگ آتے تینا قوت نا زور اٹ مُر کرسا مونی کاہک۔ بے کار تولنگ دوست مفک تے، بندغ آک اوڑا بھروسہ کیرہ، او ہم ہر وڑ اٹی تینا اعتماد ءِ برجا تخنگ نا کوشست کیک۔

دا برج والا بندغ دولت نا گیشتری آن پد ہم بھاز کفایت شعاری، بھاز عقل مندی اٹ خڑچ کیک۔ تینا ہچ ءُ نزوری اسے پاش کپک۔ قدرتی ندارہ غاتتون بھلو است خواہی اس تخک۔

پروفیسر غلام دستگیر صابر یعنی ”ثور“ برج والا بندغ ”جدی“ و ”سنبلہ“ برج والا بندغ آتتون جوان ءُ سنگتی اس کننگ کیک۔دا اودے دھوکہ تفسہ۔ دا دوست آک تینا جان ءِ ہم قربان کننگ کیرہ۔ ”حمل“، ”جوزا“، ”سرطان“ و ”حوت“ برج والا دوست آک ہم جوان ءُ سنگت مننگ کیرہ۔ مشکل وخت اٹی کاریم بریرہ، اسٹ ایلو نا فائدہ غاتا خیال ءِ تخرہ۔

”ثور“ برج والا بندغ کن دا المی ءِ کہ او ”اسد“، ”عقرب“ و ”دلو“ برج والا بندغ آتیان تینا خیال ءِ تخے انتئے کہ دا اوڑکن ہچ ءُ وڑ اسیٹ قابل اعتبار پک مننگ کپسہ۔ اوڑتون کست و کاڑ، ریس کیرہ، اونا کسر اٹی اڑانگ شاغنگ نا ہم کوشست کیرہ۔

پروفیسر غلام دستگیر صابرؔ (13 مئی 1969ء) نا برج ”ثور“ ءِ۔ دا برج والا بندغ براہوئی زبان نا ایلو شاعر و ادیب آتے ٹی افضل مینگل (25اپریل 1951ء) ذوق براہوئی (5 مئی1967ء)، عبدالحمید عزیز آبادی (21 اپریل 1967ء)، ڈاکٹر عبدالرحمن براہوئی(15 مئی1940ء)، عبدالقیوم بیدارؔ (15 مئی 1956ء)، بابو عبدالرحمن کرد(21اپریل 1930ء) اوار ءُ۔

پروفیسر غلام دستگیر صابرؔ (13 مئی 1969ء) نا ودی دے ئی عدد ”4“ ءِ۔ دا ساز و زیمل نا عدد اسے۔ دا عدد اٹی بغاوت ہم ساڑی ءِ۔ علم الاعداد نا چاہندار آتا رد اٹ عدد ”4“ والا بندغ آک عجیب و غریب مریرہ۔ دا عدد والا تے پُہہ مننگ بھاز مشکل ءِ۔ واہم دا عدد والا جوان ءُ سنگت اس مننگ کیک، وفادار مریک۔

پروفیسر غلام دستگیر صابرؔ نا مرکب عدد ”36“ ءِ:

(Dastgeer Sabir 4+1+3+4+3+5+5+2=27- 3+1+2+1+2=9–36)

علم الاعداد نا چاہندار آتا رد اٹ دا عدد جوان اِنگا عدد آتیان ءِ۔ دا مرکب عدد ہر ڈٹ ڈَول ءِ بھاز جوانی اٹ سرسہب کننگ نا واکداری تخک۔ مفہوم نا رد اٹ مرکب عدد ”27“ آنبار ءِ۔ مرکب عدد ”27“ وس و واک، عزت نا نشانی ءِ۔ دا مرکب عدد والا بندغ آک گیشتریکان دانشور مریرہ۔

پروفیسر غلام دستگیر صابرؔنا لائف پاتھ عدد ”7“ ءِ:

(1+3+5+1+9+6+9=34–3+4=7)

لائف پاتھ عدد ”7“ تنیا پسند نمبر اسے۔ دا عدد والا دے اٹی منہ کلاک یکہ گدریفنگ خواہک۔ ٹیم ورک اونا مزاج نا خلاف ءِ۔ ایلو نا پنت و شون آ خاص چکار کپک۔ اولیکو ملاقات اٹی سفا بے مہر، متکبر خننگک۔ دنیا نا کل آن زیات پنی آ نیاڑی لیڈی ڈیانا نا لائف پاتھ عدد ہم ”7“ ئس۔

پروفیسر غلام دستگیر نا ودی دے 13 (مئی 1969ء) ءِ۔ 13 نا عدد بنیکی وڑ اٹ عدد ”1“، عدد ”3“ نا مرکب ءِ۔ ہراکہ واکداری، فائدہ نا عدد ءُ۔ دا عدد دہشت ناک ہم ارے و اسہ روحانی عدد اس ہم ارے۔ پروفیسر غلام دستگیر نا ودی دے (13 مئی 1969ء) آن بیدس براہوئی زبان نا ایلو ادیب و شاعر آتیان غفور جان ساسولی نا ودی دے 13 (اپریل 1971ء)، ڈاکٹر عنبرین مینگل نا ودی دے (13 اگست 1973ء)، و حسن ناصر نا ودی دے (13 فروری 1984ء) ءِ۔

ہفتئی تلار
تاک: 35
24-18 ستمبر 2021ء
پنہ: 06

Get real time updates directly on you device, subscribe now.

Leave A Reply

Your email address will not be published.