حمید عزیز آبادی (برج ثور)

شاہین بارانزئی 

0

Get real time updates directly on you device, subscribe now.

 عبدالحمید عزیز آبادی (ودی دے اپریل 1967ء)۔ برج ”ثور“ (Taurus)، استار ”زہرہ“ (Venus)، تب ”خاکی“ (مِشی)، دروشم ”خراس نا ڈیک“، ہم تب برج آک ”سنبلہ، جدی“ و، جتا تَب انا برج آک ”اسد، عقرب، دلو“، بِسٹ اسہ مزاج نا برج آک ”حمل، جوزا“، دانا بے کنڈ ہلوک آ برج آک ”میزان، قوس“، منطقہ البروج اٹی عدد ”2“ ءِ۔ عددی حرف آک ”ب، و“، خوش بختی نا عدد ”6“، دے ”جمعہ“، کلید وجود ”محبت، دوستی فنکارانہ لائخی“ ءِ۔

حمید عزیز آبادی یعنی برج ”ثور“ انا بندغ ذہین، محنتی، مستقل مزاج، متحمل مزاج، بھاز طاقتور و حسن و محبت نا دلدادہ مریک۔ دا برج (ثور) انا بندغ محفل کروک، تینے تنیائی آن بچفوک، جسمانی وڑ اٹ پرکشش، تینا کاریم ءِ اُست انا ہُب اٹ کروک مریک۔ تینا تب انا رد اٹ سوچ و فکر کروک، تینا خواہنداری تے جذباتی کیفیت اٹی پورو کننگ کن کوشست کروک، قوت برداشت اٹی حیرت انگیز، آجو چاگڑد اس ملّپننگ آ اخلاقی اصول آتیا کاربند سلوک مریک۔

فلکیات نا ماہر آک پارہ کہ برج ”ثور“ انا بندغ حالیت نا تیز و ترندی نا وخت آ تینا ہمت و حوصلہ ءِ بٹپک بلکہ تینا ذہنی بیداری نا وسیلہ اٹ حالیت آتتون مقابلہ کروک مریک۔ اعصاب شکنی آن مُرّ، حواس باختگی آن پاک مریک۔

برج ”ثور“ انا خواجہ زبردستی اٹ محبت نا خواہندار مفک، بلکہ حقیقی محبت نا خواہندار مریک۔ ہر وڑ انا تکلیف آتے برداشت تو کیک ولے تینا عزت نفس ءِ مجروح کپک۔ تینا بروک آ وخت اکن مدام کوشست اٹی مریک۔ انتہائی غیرت مند و تینا زند ءِ تینٹ تینا خوداری نا وڑ اٹ گدریفک۔

حمید عزیز آبادی کون انگا بندغ آک یعنی برج ”ثور“ والا بندغ تینا تب اٹی مَش آنبار سوگو، ارادہ نا پکا مریک۔ بے سہبی نا قائل مفک، تینا کسر نا مون اٹی بروک آ ہر وڑ انا اڑانگ آتے تینا واکداری اٹ مُرّ کرسا مونی کاہک۔ بے کار تولنگ دوست بفک تے۔ بندغ آک اوڑا بھروسہ کیرہ، او ہم ہر وڑ اٹی تینا اعتماد ءِ برجا تخنگ نا کوشست کیک۔

برج ”ثور“ والاک دولت نا گیشتری آن پد ہم بھاز کفایت شعاری، انتہائی عقل مندی اٹ خڑچ کیرہ۔ تینا ہچ ءُ نزوری اسے پاش کپک۔ قدرتی نظارہ غاتتون بھلو است خواہی اس تخک۔

حمید عزیز آبادی یعنی ”ثور“ برج انا خواجہ ”جدی“ و ”سنبلہ“ برج والا بندغ آتتون جوان ءُ سنگتی اس کننگ کیک۔ دا اودے دھوکہ تفسہ۔ دا سنگت آک تینا جان ءِ ہم قربان کننگ کیرہ۔ ”حمل“، ”جوزا“، ”سرطان“ و ”حوت“ برج والا دوست آک ہم جوان ءُ سنگت مننگ کیرہ۔ مشکل وخت اٹی کاریم بریرہ، اسٹ ایلو نا فائدہ غاتا خیال ءِ تخرہ۔

”ثور“ برج انا خواجہ کن دا المی ءِ کہ او ”اسد“، ”عقرب“ و ”دلو“ برج والا بندغ آتیان تینا خیال ءِ تخے، انتئے کہ دا اوڑکن ہچ ءُ وڑ اسے اٹ قابل اعتبار سنگت مننگ کپسہ۔ اوڑتون کست و کاڑ، ریس کیرہ، اونا کسر اٹی اڑانگ شاغنگ نا ہم کوشست کیرہ۔

حمید عزیز آبادی نا ودی دے 25 اپریل (1951ء) نا ودی دے ئی عدد ہم ”1“ ءِ۔ ودی دے ئی عدد ”1“ مچ آ عدد آتا بیخ و بنداو ءِ۔ ودی دے ئی عدد ”1“ ”دے“ اکن کاریم اٹی اتنگک۔ دا اسہ فائدہ مند ءُ عدد اسے۔ خوشی، سرسہبی، شونداری نا عدد ءِ۔

حمید عزیز آبادی یعنی ودی دے ئی عدد ”1“ والا بندغ آک بھاز محنتی مریرہ۔ خودار مریرہ، خود مختاری اوفتے دوست مریک، ایلوفتا پرمان اٹ کاریم کننگ دوست بفک تا۔ ہمو وخت جوان ءُ کارکڑد اس نشان تننگ کیرہ ہرا وخت کہ اوفتے آجو موڈ اٹی کاریم کننگ کن اِلنگے۔ عدد ”1“ والا بندغ جوان ءُ قاعدہ و لائخی ہم تخک۔ دا عدد نا بندغ آک جوان ءُ دانشور، مطالعہ نا شوقی مریرہ۔

دن کہ ہر بندغ نا مزاج اٹی چندی جوانیک مریرہ، ہندن منہ خامی یا دُن پان کہ نزوری ہم مریرہ۔ برج ”ثور“ انا بندغ آتا تب اٹی ہرا نزوریک مریرہ او دادو کہ ہرا وخت کہ اونا کسر اٹی اڑانگ اس برے، سخت خار بریک تا، دا اڑانگ آتے مر کننگ کن پین خار اٹ برسا نن و دے کرسا اڑانگ آتے مُر کیرہ۔ کس انا ماتحت کاریم کننگ دوست اف تا۔ ہچ ءُ تکلیف اس تینا اناء غا اولیت تفسہ۔

براہوئی زبان نا ادیب آتے ٹی ”ثور“ برج انا بندغ آتے ٹی افضل مینگل نا ودی دے 25اپریل 1951ء، ذوق براہوئی 5 مئی 1967ء، پروفیسر غلام دستگیر صابرؔ 13 مئی 1969ء، ڈاکٹر عبدالرحمن براہوئی 15 مئی 1940ء، عبدالقیوم بیدارؔ 15 مئی 1956ء، بابو عبدالرحمن کرد 21اپریل 1930ء اوار ءُ۔

حمید عزیز آبادی تون اوار براہوئی زبان نا ایلو ادیب و شاعر آتے ٹی ودی دے ئی نمبر ”1“ والا بندغ آتے ٹی عبدالصمد شاہین (ودی دے یکم جنوری 1931ء)، شہزاد غنی (ودی دے 2 اگست 1975ء)، عبدالرازق ابابکی (ودی دے 4 اگست 1983ء)، زاہد براہوئی (ودی دے 8 اگست 1976ء)، مراد صابر (ودی دے 10 مارچ 1988ء)، عبدالرزاق صابر (ودی دے 10 اکتوبر 1954ء)، ڈاکٹر غلام سرور پرکانی (ودی دے  10 اگست 1957ء)، غفور جان ساسولی (ودی دے 13 اپریل 1971ء)، ڈاکٹر عنبرین مینگل (ودی دے 13 اگست1973ء)، نیلم مومل (ودی دے  14 اگست 1981ء)، ڈاکٹر تاج رئیسانی (ودی دے  15 اپریل1957ء)، غلام نبی راہی (ودی دے 15 اگست 1939ء)، شاہین بارانزئی (ودی دے 19 جون1974ء)، ڈاکٹر علی احمد شاد (ودی دے 20 دسمبر 1964ء)، بابو عبدالرحمن کرد (ودی دے 21اپریل 1930ء)، مولانا عبدالغفور درخانی (ودی دے 22مارچ 1922ء)، غمخوار حیات (ودی دے 25 مارچ 1975ء)، نور احمد پرکانی (ودی دے 25 اگست1967ء) و جوہر براہوئی (ودی دے 28 جنوری 1950ء) اسک اوار ءُ۔

 

ہفتئی تلار

تاک: 30

20-14 اگست 2021ء

پنہ: 07

Get real time updates directly on you device, subscribe now.

Leave A Reply

Your email address will not be published.