جے یو آئی (ف) نا گچین کاری تیٹی کس اتون سیوت کپننگ نا فیصلہ

اسلام آباد :  جمعیت علماء اسلام (ف) بروک آ قومی صوبائی گچین کاری تے آئینی مُد اٹ کننگ نا سلاہ تسنے وخت اس کہ لس گچین کاری تے ٹی اسہ سیاسی جماعت اسے تون ہم سیوت کپننگ نا فیصلہ کرینے۔ پارٹی کے پی تون اوار کل قومی و صوبائی حلقہ غاتے ٹی تینا اومیتدار سلفک۔ جمعیت علمائے اسلام نا بنجائی مجلس عاملہ نا دیوان مسٹمیکو دے ہم برجا سلیس۔ جمعیت علمائے اسلام نا میڈیا سیل آن جاری بیان نا رد اٹ جے یو آئی نا ترجمان اسلم غوری دیوان نا بابت پارے کہ دیوان ناکماشی ءِ جے یو آئی نا سروک مولانا فضل الرحمان کرے‘ دیوان اٹ دستوری ترمیم تے گڈیکو دروشم تننگا‘ بروک آ قومی و صوبائی گچین کاری تا بابت پک فیصلہ کننگک‘ دیوان اٹ ملکی قومی سیاسی حالیت آتیا سلابت کننگا‘ اوپارے کہ بروک آ قومی صوبائی گچین کاری تے آئینی مُد اٹ کرفنگ نا سلاہ تننگانے‘ دیوان اٹ بنجائی سیکرٹری جنرل مولانا عبدالغفور حیدری، مولانا قمرالدین، مولانا صلاح الدین، سینیٹر کامران مرتضیٰ، مولانا امجد خان، سینیٹر مولانا عطاء الرحمان، خلیل احمد، مولانا غلام قادر، مفتی ابرار احمد خان، جلال الدین ایڈوکیٹ، مفتی روزی خان وخت اس کہ بنجائی ناظم گچین کاری مولانا عطاء الحق درویش خصوصی بشخ ہلک۔

(آن لائن)