بڑز مش نا باتیک (ناول)۔۔۔۔۔۔مسٹمی بشخ (iv)

 

اسہ نن نا مسافر:۔

ای پاریٹ اوخس تو تہو ارے کہ مچٹ دانگ مچٹ اینگ کار کل آن کل ڈغار اٹ لگرہ نی مچٹ دا مِش ءِ چنک آ تینا وزن کرک فیروز ہم ہندن کرے کہ اودے دا مِش ننے عام وڑ انامِش آن زیات کبین لگاکہ تو فیروز پارے انت کہ ارے دا مِش تا کیرغ آن راز تخوک ءِ۔ فیروز اسہ وار ولدا بش مس کنے پارے ……ہمت کر داسہ کسر دو برے ننے۔

ای پاریٹ …… سہی پاریس کل راز دا مِش انا کیرغ اٹی ءِ ایہن نی انت پاسہ، داسہ یا سہب اکن ہرن……؟

فیروز……سائیں نا سیاہ مار تیا انت بھروسہ سُہب اکن اِلر ننے یانہ۔

ای ہم فیروز تو تفسا داسہ غار اٹ دا کُنڈ آ مِش تے ختنگ اٹ لگاٹ وار اس جاگہ جاگہ درکنگ آ لگاٹ تو فیروز توار کرے برک دا کنج آ اوار درکن۔ ای اوڑتون اسہ جُپ اس خلکُٹ تو شیف آ مِشک ایلو جاگہ تیان زیات شیف بڑز مسُرہ۔ ای فیروزءِ پاریٹ انت کہ ارے کسر ہنداڑے فیروز اسیکا سل توفک آتے تینا ہرفن۔

فیروز نا پاننگ دا ئس کہ انت کاریم اس بریرہ ننے دا بے سُم آک۔

ای پاریٹ……اوتو وخت آخبر تمک ننے فی الحال پین آخا لٹ انا جاگہ تو ہلکُنو نن کن۔

ہراتم نن دِرّکان تو شیف فرش زیات سُرنگ ئس۔ ہندا ئس کہ نن اسہ زمبارہ اسیٹ شیف ہنان۔ ای بیرہ زی آ ہندا خناٹ کہ ہنداڑے گول گول کسر اس جوڑ ئس ہرادے پاٹ تیٹ بند کریسُر۔ کنا و فیروز نا وزن آن یلہ مس۔ نن زی آن اسہ دم تون شیف تمان۔ دم اس تینے راست کننگ اٹ لگا ننے اوکان گڈ۔

ہنداٹی فیروز سلطان نا ہیت ءِ کاٹ کرسا پارے……سلطان دلبر شڑت آتے گیرام کپیس۔ چاکر نا خیر اسے دا ورنا نا گپ پک اف داسکان۔

سلطان ہم پارے ……تو دامس ننا سفر نا اولی بشخ داکان مون نا بشخ اٹ شڑت آک تخوک ءُ۔ مونی گپ ہمو شڑت آ مریک ہراتم راضی نامہ مرے نما نن تون۔

چاکر……مہران آ ہُرا پارے ……دیگر تو مس شڑت آک تخوک ءُ۔ نن کن انت پاسہ بنن تا یا واپسی ہم کروئی ئس۔ پیری کسر آ ہروک مروءِ۔

مہران……پیرہ پارے اینو نم مَش مون آ مبو تینا ٹولی تون گپ کبو کنے و بلہ ءِ نما شار آ ہنوئی ءِ کاریم اسیٹ۔

چاکر ……دا گپ ہم سہی ءِ دم اس پین اوار ی ننا ایہن ہم پیرہ نا مون آ بھاز آ گپ آک مشکل ءِ مریر۔

سلطان سہی پاسہ…… ایہن ہم ننا دا کسر اٹ پیر انگا تا جنجال اٹ تمنگ خواپنہ تو انت پاسہ شڑت ءِ مونی کسہ نا پاننگ نا پاو یانہ۔

چاکر ……انت کہ نما منشا شڑت ءِ پاس تو زبر مریک ایہن۔

سلطان فیروز آ ہُرا تو فیروز ہم کاٹم ءِ آن وڑ اٹ سُرفے ہندا ٹی سلطان ہم بادوی کرے……چاکر گپ دادے کہ اوڑے ننے ”پور“ پنی اس ملا۔ اونا بابت اونا شڑت آن گڈ پاننگ مریک۔ شڑت دادے کہ ہرکس ءِ نن مونی کسہ ءِ پارین تو اودے نن تون اوار مونی سفر کروئی مریک۔

مہران ……اگہ کس سفر کپ ہم بنے گڑا۔

فیروز……او وڑتو بقولِ پور نا بد انگا حالیت آتا کسہ اس بنا مریک۔ اگہ اول شڑت تون آن کرے کسہ بننگ آن گڈ پارے ای نم تون بننگ کن راضی افٹ۔ تو او تینا تینٹ زموار مریک بد آ دے تا۔

چاکر……آسمان نا کنڈ آ ہرسا بشخندہ اس کرے کہ داکان زیات ہم زند اٹ بد مننگ کیک ہراخس کہ ای زند انا چندی سال آتے تدیفینٹ۔

سلطان……او گپ آ ہرس تو نی، ای فیروز دا کل جوان انگا دے تے بھاز کم خنانن۔ بد انا او خلیس اف ننے ولے بس امر کہ شڑت اس نمے خبر کروئی ئس۔

مہران……ای کس پائے محل اسیٹی مسُنٹ ہمیکان سرپندی مسُنٹ بیرہ زوراک ہمو نا پن آن بیدس کن کِن ہچ اس سلتنے۔

فیروز……دا گپ ہم ارے دا زوراک نا ہچ گپ متو نیام اٹ؟

چاکر……اودے پٹنگ نا کوشست ءِ بھاز کرین۔ بیرہ ہندا حوال ملا کہ او تینٹ تانکسکان کس اتون ملنگ نا حق اٹ متنے کس اودے دُن زوخنپک نئے دوست آک تے نئے دشمنک او اسہ ”حق نا باغی“ اسے چوہ کل انا مون آ برے کس ءِ خبر اف۔

سلطان ……اچھا مطلب اونا منشا غا گپ سلوک ءِ تو دا ہیت آ برین نم نن تون بریر ءِ یانہ؟

چاکر……اگہ راست پاو تو کنے نما واپس بننگ نا بھاز خوشی مس۔ بھلو وخت اسے آن گڈ خوشی دو بسنے کنے ولے داسہ دم درینگانٹ دا زند انا سرگڑدانی تیان۔ کوشست کنا ہندادے ہندا جل تیٹ تینا زند ءِ ایسر کیو بلکہ مرک برے زو جارات اس دوبرے کنے۔

فیروز……چاکر نی تو دُن الویس مرک انا کسر ہروک آتیٹ۔

چاکر……ای بھاز آ گڑا الوٹ بس زند کنے جوڑ کرے……حالیت آک کنے دُن کریر۔

سلطان……اگہ زند مرک انا کسر آ ہروک ءِ تو او کسر ننا سفر آن گام کرسا پدا مرک آ سر مرے ایہن ہم داسہ نن کن پین زند اٹ کننگ کِن ہچ سلتنے۔

فیروز……مخسا پارے چاکر نی تو شوانی اس خناس۔ نن ہمونا ہم افن۔

چاکر……دا سفر نا مقصد انت مرو ءِ؟

سلطان……دازند آن ہرا گڑا ننے نے دو بتو اونا اسہ اُستخوائی سینا پورو مننگ نا کسر اس۔

چاکر……ہروڑ انا۔

سلطان……ہروڑ انا مریک یانہ او ننے ”پور“ پاننگ کرو ءِ……ایہن ہم زند ءِ کس انا مقصد اس متو تو او اُستخوائی تا کسر ءِ ہلیک ہمو اُستخوائی تا ہرافتا پورو مفننگ نا ارمان اس اُست اٹ ہمیش مچ زند جہی مریک۔

چاکر……ای منوہ زند بے مقصد مس تو بندغ زند آن بے زار مرسا مرک انا کسر آ ہروک مریک۔ ای بے مقصد تو اریٹ ولے اُستخوائی کل آتے مریک کنے ہم ارے ولے داسہ سوال دا ودی مس کہ ہرا اُستخوائیک پورو مریرہ…… اوڑکن نم تون تُد مننگ ضروری ءِ ولے پیرہ ءِ امر کیو؟

فیروز……گڑا دُن کین پگہ نما پیرہ و بلہ غان اجازت آن گڈ کسہ ءِ پانہ نمے اینو کن ہنداخس گپ آک پین۔

ہندا ہیت اتون کل آک آن کرسا شام ءِ پین گپ آتیٹ تیر کریر پگہ نا انتظار اٹ۔

٭٭٭

ہفتئی تلار
تاک:40
29-23 اکتوبر 2021ء
پنہ: 04