حکومت الس ءِ اوفتا درگہ غا طبی آسراتی تے رسیفنگ خواہک،ڈاکٹرامین خان مندوخیل
ٹیچنگ ہسپتال گوادر اٹی خورک اسامی تے زُو پر کننگ نا بابت بڑزکو کہولی کمامدار آتتون حوال کننگک
گوادر، صوبائی حکومت بلوچستان نا السی جانجوڑی نا پالیسی نا رد اٹ الس ءِ آب اٹو و وخت آ طبی آسراتی تا فراوانی نا جاچ ءِ ہلنگ کن ڈائریکٹر جنرل جانجوڑی بلوچستان ڈاکٹر امین خان مندوخیل میر عبدالغفور کلمتی ٹیچنگ ہسپتال گوادر نا دورہ ءِ کرے۔ دا وخت آ او وارڈ، او پی ڈی، تھیلیسمیا سینٹر، ڈائلیسز یونٹ، میل و فی میل وارڈ، ڈینٹل بشخ‘ خن تا ناجوڑی نا بشخ‘ لیبارٹری و ڈرگ اسٹور نا دورہ ءِ کرے و ناجوڑ آتے فراوان کروک طبی آسراتی، دارو تا فراوانی و تعلقدار بشخ آتا کارکڑد نا جاچ ءِ ہلک۔ میڈیکل سپرنٹنڈنٹ ڈاکٹر حفیظ بلوچ اودے ہسپتال نا جم کارکڑد‘ انتظامی باندات‘ طبی آسراتی و مون تروک ویل آتا رد اٹ بریفنگ تس۔ دا وخت آ ہسپتال اٹی خورک اسامی تیا بھرتی تتون تعلقدار باندات آ ہم شرہ مس۔ ڈائریکٹر جنرل جانجوڑی باور کرفے کہ خورک اسامی تے زوت پر کننگ نا باندات آ بڑزکو کمامدار آتتون رابطہ و المی گام گیج کننگک تاکہ ہسپتال اٹی طبی کارندہ غاتا کمتی ءِ اینک کرسا الس ءِ گچین درمان نا آسراتی تا فراوانی ءِ پک کننگ مرے۔ او ڈاکٹر و پیرامیڈیکل اسٹاف نا وخت آ حاضری ءِ پک کننگ، کسبی زمواری ءِ ایمانداری اٹ سر تننگ و ناجوڑ آتے بے فرق آن آب اٹو طبی آسراتی تا فراوانی آ زور شاغا۔ پولیو مہم نا بابت ہم پارت کرے کہ کوریج اٹی مروک اڑاند آتے اینک کرسا کل چناتے رکھی پڑی کنفنگ کن بھرمی گام گیج و ٹیم تا کارکڑد نا چاروکی ءِ پک کننگے۔ ڈائریکٹر جنرل جانجوڑی پارے کہ صوبائی حکومت بلوچستان الس ءِ اوفتا درگہ غا آب اٹو‘ بھرمی و وخت آ طبی آسراتی تا فراوانی کن سنبرینگوک ءِ، ہراڑکن سرکاری ہسپتال آتا کارکڑد، انتظامی نظم و ضبط و طبی کارندہ غاتا زمواری اٹ سرتروک خذمت آک بنداوی اہمیت تخرہ۔ دا وخت آ ضلعی افسر جانجوڑی گوادر ڈاکٹر یاسر طاہر، پی پی ایچ آئی نا ڈسٹرکٹ منیجر ڈاکٹر منیر احمد و ایلو تعلقدار افسرآک ہم اوڑتون اوار ئسر۔