اومیت ءِ گوازی گرک انگلینڈ نا برخلاف جوان کارکڑد نشان ایترہ‘ عثمان قادر

اسلام آباد (مانیٹرنگ ڈیسک) لیگ اسپنر عثمان قادر پارینے کہ قومی ٹیم آن ڈراپ مننگ بھاز فریشان کرے کنے۔ اومیت ءِ کہ گوازی گرک انگلینڈ نا برخلاف سیریز اٹ جوان ءُ گوازی کیرہ۔ شاداب خان و یاسر شاہ نا ساڑی گری ٹی مسٹمیکو لیگ اسپنر نا ہچ ءُ گنجائشت اس اف، تینا  آخبت نا بابت فریشان افٹ، یقین ءِ کہ ولدا کم بیک اٹ سرسہبی مریوہ۔ تینا انٹرویو سے ٹی عثمان قادر پارینے کہ تینا باوہ عبدالقادر نا وڑاٹ دا وخت اسکان سرسہب مفننگ اٹ کیہی سوب آک ءُ، ڈومیسٹک کرکٹ اٹ زیات میچ ملپننگ آ آسٹریلیا ٹی آخبت ءِ تینا جوڑ کننگ نا خواہندار اُٹ ولے باوہ نا اُست خواہی ئس کہ حالیت آک امر کے مریرتینا ملک انا نمائندگی ءِ کروئی ءِ، قومی ٹیم نا بشخ اس مننگ نا ارمان پورو مس، داسہ کوشست ءِ کہ تینا جاگہ ءِ پک کیو، باؤلنگ تون اوار اوار بیٹنگ ءِ ہم جوان کننگ نا خواہندار اُٹ، آخبت اٹ اسہ آل راؤنڈر اسے نا پن ءِ جوڑ کننگ نا خواہندار اُٹ۔ عثمان قادر واضح کرے کہ ای بیرہ ٹی 20 اسکان محدود مروئی اف، ہر مسٹ انگا فارمیٹ اٹ ملک انا نمائندگی ءِ کننگ نا ارادہ ءِ، قومی ٹیم تون رہنگسا بھاز آ گڑاتے ہیل کننگ نا وارخواہی رسینگ انگ ءِ، سنگت کرکٹر آک بھاز راہشونی کریر، مننگ کیک وارخواہی زیات رسینگپ ولے ٹیم اتون رہنگ انگ آن کیہی آزموندہ غاک رسینگرہ۔ عثمان قادر پارینے کہ بگ بیش و پاکستان سپرلیگ بریبر پاننگ سہی اف، ننا ملک اٹ لیگ مالو آن زیات سرسہب مننگ بنا مسنو۔ او پارینے کہ ای بابر اعظم، ویرات کوہلی و اے بی ڈی ویلیئر ءِ آوٹ کرفنگ نا خواہندار اُٹ، برائن لارا ءِ باؤلنگ کننگ نا ارمان ئس ولے او ریٹائرڈ مسنے ہندا سوب آن دا اُست خواہی شاید ہچ پورو مف۔