جوہر بنگلزئی (برج جدی)
شاہین بارانزئی
جوہر بنگلزئی (یکم جنوری 1970ء) برج ’’جدی‘‘ (Capricorn)، حاکم استار ’’زحل‘‘ (Saturn)، تَب ’’خاکی‘‘ (مشی)، نشانی ’’گڈ‘‘ (مش انا میل/)، ہجی نا حرف آک ’’ج، گ‘‘، تَب انا ایلو برج آک ’’ثور، سنبلہ‘‘، تَب آن چَپ برج آک ’’حمل، سرطان‘‘، اسہ وڑ انا برج آک ’’عقرب، قوص، دلو، حوت‘‘، بے کنڈ ہلوک برج آک ’’جوزا، اسد‘‘، منطقہ البروج ’’دہ میکو‘‘، ودی دے ئی عدد ’’1‘‘ مرکب عدد ’’46‘‘، لائف پاتھ عدد ’’1‘‘، فطری گچین کاری ’’ذہنی‘‘ ءِ۔
برج(جدی) والا بندغ اصول پسندو اصول آتا پابند مریک۔ اصول آتیا سختی اٹ عمل کیک۔ ہر گڑا ءِ ایلوفتا نشان تننگ کن کننگ آن بد دیک۔ اُست خواہی، خواری اٹ کاریم کرسا تینا کارکڑد ءِ نشان تننگ نا خواہندار مریک، تینا ذہنی لائخی اٹ ویل آتا ایسری کن محنت کروک، ہر کاریم ءِ اونا ترتیب اٹ مون آ دننگ و مناسب وخت انا زی آ اونا نتیجہ نا خواہندار مریک۔
فلکیات نا چاہندار آتا رد اٹ برج ’’جدی‘‘ والا ترند تَب مریک، نشان تننگ آن مُرّ، خواری کش، ہر کاریم ءِ تینا اُست انا ہیجکامی اٹ کروک، کاروبار، تحقیق و تفتیش، تصنیف و تالیف اٹی ہم تینا مٹ تینٹ ءِ۔ شاندار شخصیت نا خواجہ ءِ۔ اونا طب سخت ءِ، چندی کنفیوژن آتیان بچنگ کن اونا طب ءِ پُہہ مننگ المی ءِ۔ دا برج والا تینا ہیت انا نمن ءِ بننگ خواپک۔ بھروسہ مننگ کیک ایا تے۔ او تینا بھروسہ کروک آتے فائدہ تننگ اٹی خوش مریک۔ مخلوق نا سفت کننگ آن اونا ہمت و حوصلہ زیات مریک۔ بھاز جوان ءُ وڑ اسے ٹی، خواری اٹ کاریم کننگ ءِ اولیت ایتک۔ ہرکاریم اٹی جوان سونج رونج کروک مریک، ہرا وخت تینا کاریم ءِ جوان سونج رونج کرسا سرجم کیک تو بھاز اُست جم مریک۔ دانگ اینگ تینا مون پیری خلنگ، وخت انا زیان کننگ ءِ جوان تکپک۔ تینا آخبت ءِ خواری و محنت اٹ سوگو کروک، مچٹ بندغ آتتون دوستی تخک ولے قابل اعتماد دوستی ءِ دوست تورک، مسخت کن تینا بے کچ سنجیدہ مریک، مسخت ءِ دوئی کننگ کن بھاز احتیاط اٹ کاریم کیک۔
براہوئی زبان نا ایلو برج ’’جدی‘‘ نا ادیب شاعر آتے ٹی افضل مراد (2 جنوری1961ء)، حاجی عبداللطیف بنگلزئی نا (یکم جنوری 1954ء) عبدالصمد شاہین (یکم جنوری 1931ء)، سلطان احمد شاہوانی (5 جنوری 1962ء)، پروفیسر منظور بلوچ (یکم جنوری 1970ء)، نادر شاہوانی (یکم جنوری 1964ء)، پروفیسر جاوید اختر (15 جنوری 1964ء) و حمیرا صدف حسنی (17 جنوری 1978ء) اسک اوار ءُ۔
جوہر بنگلزئی نا لائف پاتھ عدد ’’10‘‘ ءِ۔ دا عدد لائف پاتھ عدد ’’1‘‘ نا بریبر ءِ۔ لائف پاتھ عدد ’’1‘‘ لیڈر نا عدد اسے۔ سوگو ارادہ نا خواجہ، سوچنگ و ٹک خلنگ آن زیات عمل کننگ آ باور کیک۔ تینا زند ءِ مدام جوان آن جوان جوڑ کننگ ناپد و رند اٹ مریک۔ تولنگ ہُننگ نا جاگہ غا گڑاس کننگ نا خواہندار مریک۔ ہمت و حوصلہ نا خواجہ مریک، کماشی کننگ نا لائخی تخک۔ وخت اس زو فیصلہ کیک ولے دا دوست اف تے کہ اونا فیصلہ ءِ پین کس پرغے۔ لائف پاتھ ’’1‘‘ نا منفی پہلو تے ٹی دا گڑاک ساڑی ءُ کہ او انت گڑاس کہ دوئی کرینے است جم مفک، بے صبر ہم مننگ کیک۔ تنقید ءِ مننگ اٹی مشکل محسوس کیک شرہ دوست مریک تے۔
جوہر بنگلزئی نا مرکب عدد ’’46‘‘ ء۔
(Joher Bangulza 1+7+5+5+2=20– 2+1+5+3+6+7+ 1+1=26–20+26=46)
دا عدد ’’37‘‘ تون خڑکی تخک۔ دا ٹی پین گیشتری دادے کہ دا عدد جنسی اسکینڈل ودی کننگ کیک۔
جوہر بنگلزئی نا فطری گچین کاری نا عدد ’’ذہنی‘‘ ءِ۔ اونا ذہنی گچین کاری نا خانہ ٹی ’’J,H,A,N,G,L,A‘‘، جذباتی گچین کاری نا خانہ ٹی ’’O,B,Z,I‘‘ جسمانی گچین کاری نا خانہ ٹی ’’E‘‘ و وجدانی گچین کاری نا خانہ خالی ءِ۔
ہفتئی تلار
تاک:06
11-05 فروری 2022ء
پنہ: 07