سیکورٹی ہائی الرٹ،داخلہ سلاہکار میر ضیاء اللہ لانگو نا شار انا دورہ

کوئٹہ (تلار حوالکار) کوئٹہ تون اوار مچ آ صوبہ ٹی دہشت گردی نا گمانی گڑتی تا رد اٹ سیکورٹی ہائی الرٹءِ، دا رد اٹ تدوک آ دے داخلہ سلاہکار میر ضیاء اللہ لانگو کوئٹہ شار انا دورہ ءِ کرے۔ داخلہ سلاہکار قندھاری بازا، باچاخان چوک، لیاقت بازا پرنس روڈ،جناح روڈ و منان چوک تون اوار ایلو علاقہ غاتیا ہم ہنا۔ داخلہ سلاہکار شاری تتون مِلا، ویل آتے خف توریاو شار اٹی سیکورٹی بست و بند آتیان خوش مس۔ دا وخت آ میر ضیاء اللہ لانگو پارے کہ بلوچستان نا الس بہادر ءِ، دہشت گردی نا برخلاف جنگ اٹی ملک انا 70 ہزار بندغ تینے ندر کرینو۔ او پارے کہ سیکورٹی تھریٹ آک ہر وخت مریرہ۔ حکومت و سیکورٹی ادارہ غاک جوان مون ایترہ۔ الس تینا ہڑدے ئی زند بے چرت گدریفے۔ فورس آک اوفتا رکھ اکن ساڑی ءُ۔ داخلہ سلاہکار پارے کہ تعلیمی ادارہ، واپار ہند آتتون اوار کل سرکاری و غیر سرکاری دفتر آک ہڑدے نا وڑ ملوک ءُ۔ امن ایمنی حکومت نا زمواری ءِ۔ داڑان خن تے چَپ کننگ مفک، او پارے کہ امن دشمن آتا ہر سازش ءِ بے سہب کننگ کن جوان و سوگو پالیسی تیا عمل کننگ اُن۔