مچ آ دنیا بلوچستان نا وسیلہ غاتے خن اٹ خلکنے، میر قدوس بزنجو

کوئٹہ (تلار حوالکار) وزیر اعلیٰ بلوچستان میر عبدالقدوس بزنجو پارینے کہ ننا بزرگ آک دا ملک اکن بے کچ قربانی تسنو۔او پارے کہ اینو نن تینا ہنین آ وطن پاکستان نا سوگوی و امن ناسرحال آ اڈ ہلوک کانفرنس اٹ ساڑی اُن۔دا ملک انا سوگوی و سلامتی داسہ ننا زمواری ءِ۔ دا تو پک ءُ ہیت اسے کہ امن آن بیدس اسہ قوم اس ہم شون ہلنگ کپک۔دا ہیت آتے او استحکام پاکستان امن کانفرنس آن تران کرسا کرے۔او پارے کہ عدل و انصاف و امن نا پلو ءِ ہلسا راج شون ہلنگ کیک۔اینو نا پوسکن آ دور اٹی زرگزرانی ہدف آتا دوئی کننگ آن ملک آک شونداری نا ضمانت دوئی کننگ کیرہ۔شونداری نا دا سفر کن ملک اٹی امن و سوگوی بنداوی اہمیت تخرہ۔او پارے کہ پاکستان تینا جوڑ مننگ آن داتم اسکان بھاز آ شیف بڑزی تے خنانے۔ پاکستان نا شونداری دشمن آتا گٹ آن اسُل ایپار مفک۔ دا دشمن آک مدام پاکستان ءِ نزور کننگ نا ناپاک سج آتے کاریم اٹ ایسنو۔ اینوہم ننے بھاز آ تہہ و پیشن نا چیلنج آک مون تروک اریر۔دا چیلنج آتا مون ءِ توننگ کن ننے سیوت کروک قوم اسے آنبار مونی بروئی تمک۔اللہ تعالیٰ نا دا ملک آ خاص ءُ رحمت اسے، ہرانا سوب آن ملک دشمن آتے سرسہبی ملتنے۔ پاکستان قیامت اسکان سلنگ کن جوڑ مسنے، دا وخت آ مچ آ دنیا بلوچستان و دا جاگہ نا وسیلہ غاتے خن اٹ خلکنے۔وزیر اعلیٰ پارے کہ سی پیک ڈٹ مرے یا گوادربندرگاہ ریکوڈک مرے یا ایلو نہادی معدنی وسیلہ غاک، دشمن آک خواپسہ کہ دا وسیلہ غاک بلوچستان و پاکستان نا زرگزرانی و اقتصادی شونداری کن کاریم اٹ اتنگر۔او پارے کہ بلوچستان اٹی بے ایمنی کننگ نا کوشست آتا پد اٹ ہم ہندا سج ءِ کہ دہشت گردی نا کمک اٹ دا جاگہ نا مخلوق ءِ پد تخنگے۔او پارے کہ ملک دشمن آک تینا ناپاک سج انا پوروی کن ننا ورنا چین ءِ کاریم اٹ اتنگ اٹی ءُ۔شدت پسندی نا کل آن بھلا نسخان بلوچ قوم خاص وڑ اٹ بلوچ ورنا تے رسینگانے۔نن تینا ورنا چین ءِ آجوئی نا سٹی آ تحریک آتا جِر مننگ کن الیپنہ۔صوبہ ٹی ورنا تا تعلیم و ہیلکاری آ خاص چکار کننگ انگ ءِ،ورنا تے روزگار نا وارخواہی فراوانی کن حکومتی گام گیج آتا چرجوئی برجا ءِ۔ بلوچستان نا ورنا چین داسہ علم دوست و قلم دوست ءِ۔بلوچستان اتی امن کن سیکورٹی فورس آتا قربانی تے گیرام کننگ مفک۔صوبہ نا کنج کنج اٹی امن کن ننا سیکورٹی ادارہ غاک قربانی تسنو۔نن کل قربانی تروک آتے خراج عقیدت پیش کینہ۔ وزیر اعلیٰ پارے کہ اینو نا دا کانفرنس نا کمک اٹ کنا کلہو دادے کہ ببو اسٹ مرسا ملک انا سوگو امن و سلامتی کن تینا کڑد ءِ سر ایتن۔ ورناک خاص اٹ ملک انا امن و سوگوی کن تینا لائخی تے کاریم اٹ اتیر۔