بلوچستان نا پد تمنگ نا زموار ننا جنداُن

قلعہ سیف اللہ(آن لائن) وزیراعلی بلوچستان جام کمال خان پارینے کہ ننے منوئی تمک کہ بلوچستان نا پد تمننگ نا زموار آک نن اُن، مالو نا خراب انگا ڈٹ بندی و جوان حکمت عملی نا کاختی آن بلوچستان شونداری نا مزل آتے پورو کننگ کتو، اگہ وسیلہ غاتے جوان وڑ اٹ کاریم اٹ اتنگاکہ تو اینو صوبہ نا حالیت بھاز جوان مسکہ، دا خیال آتا درشانی ءِ وزیراعلی پاک اوغان بارڈر بادینی نا ہند آ ٹریڈ ٹرمینل نا بنائی دود آن تران کرسا کرے، کمانڈر سدرن کمانڈ لیفٹیننٹ جنرل محمد وسیم اشرف، صوبائی وزیر تیان میر ضیا لانگو، مٹھا خان کاکڑ، صوبائی اسمبلی نا باسک مولوی نوراللہ، آئی جی ایف سی میجر جنرل فیاض حسین شاہ ہم او وخت آ ساڑی ئس وخت اس کہ علاقہ نا قبائلی کماش آتا بھلو کچ اس دود اٹ بشخ ہلک، وزیراعلی تینا تران اٹ پارے کہ ننے فیصلہ سازی ٹی اُلس نا مفاد آتے اولیت تروئی تمک و ہندن ءُ فیصلہ کروئی تمک ہرافتیان مالو کروک آ ردی تا پورو ممکن مننگ کے، ویل آک بیرہ نعرہ غاتیان ایسر مفسہ وخت اس کہ اوفتے کن جوان وڑاٹ گام گیج کروئی تمک، وزیراعلی پارینے کہ شونداری کاریم تے مونی دننگ کن کل فریق آتا اواری و کل انا اعتماد المی ءِ، نن تینا گام گیج آتا کمک اٹ شونداری کاریم آ اُلس نا اعتماد ءِ مستحکم کروئی ءِ، او پارینے کہ بلوچستان اٹ کل آن بھلا ویل مواصلات نا کمتی نا ءِ ہرا شونداری کاریم تیٹی اڑاند ءِ، ساڑی صوبائی حکومت صوبہ ٹی روڈ آتا جوڑ کننگک، ودکی و جوڑ کننگ نا ڈٹ آتا کنڈ آ جوان سجفنگ اٹی ءِ، ہراڑکن بھلو کچ اسے ٹی فنڈ جتا کننگانے، خدو دو نیم ہزار کلومیٹر سڑک جوڑ مس وخت اس کہ اینخو مسہ ہزار کلومیٹر سڑک جوڑ کننگ انگ ءِ ہرافتیان واپاری تون گنڈوک آ اُلس ءِ فائدہ مریک، او پارینے کہ صوبہ نا سیمی علاقہ غاتیٹی ٹریڈ ٹرمینل و بارڈر مارکیٹ آتا جوڑ کننگ نا ڈٹ آتیا عملدرآمد آن روزگار نا وارخواہی ودی مریک و زرگزرانی کاریم تیٹی ودکی مریک، وزیراعلی پارینے کہ تدوک آ ارا سال اٹ حکومت بلوچستان اٹ ریکارڈ شونداری کاریم کرے و مستی ہم کاریم برجا ءِ، بلوچستان نا شونداری نا کریڈٹ صوبائی و بنجائی حکومت، پاک فوج و ایف سی کن کاہک۔ ہرافک امن و ایمنی نا اتنگ اٹ جوان کاریم کرسا شونداری نا کسر ءِ مستی دننگ اٹ کمک کریرہراڑکن وزیراعظم، آرمی چیف و آرمڈ فورس آک مبارکباد کڑزرہ، نن بلوچستان نا شونداری کن اواری ٹی کڑد ادا کننگ اٹی اُن، او پارینے کہ اینو دنیا ٹی ہر ملک کل آن مست تینا فائدہ ءِ ہُرک و اُلس ہم سوچک کہ ننکن انت اس مریک و ننا علاقہ غاتیٹی امر جوانی بریک۔ نن دا گڑاتے ذہن اٹ تکسا مستی کانہ تو کل علاقہ غاتیٹی شونہالی بریک، او پارینے کہ صوبائی صوبائی حکومت صوبہ ٹی زرگزرانی کاریم تا کننگ کن جوان ڈٹ بندی کننگ اٹی ءِ، و اینخو نا بجٹ اٹ بھاز ہندن ءُ ڈٹ اوار ءُ ہرافتا پوروی آن روزگار نا وارخواہی تیٹی ودکی مریک و اُلس اٹ اسہ جوان ءُ بدلی اس بریک۔ داڑان بیدس وزیراعلی تختی نا نقاب کشائی ءِ کرسا ڈٹ انا بنداو ءِ تخا، کمامدار آتا کنڈآن وزیراعلی ءِ ڈٹ انا بابت اٹ بریفنگ تننگا۔