بلوچستان نا بے گوا تا ویل انا ایسری کن کل اوار تولنہ، وزیر اعظم

اسلام آباد : وزیراعظم محمد شہباز شریف تون بلوچستان نا طالب علم آتا بابت ٹہیفوک کمیشن اوڑدہی کرے‘ دا وخت آ وزیراعظم پارے کہ قومی سیاسی سرکڑدہ غاک بلوچستان نا الس ءِ امن‘ سنگتی وشونہالی ناکلہو تننگ اٹی ءُ۔ بلوچستان نا کل ویل آتے خاص وڑ اٹ مسنگ پرسنز ناویل ءِ ریاست نا کل اسٹیک ہولڈرآک اسیجا تولسا ایسر کیر‘ بلوچ طالب علم آتا غاو و اوفتا ایسری نا بابت رپورٹ سرجم ءِ۔ کمیشن نا تیار کروک رپورٹ آ وزیراعظم ءِ بریفنگ ہم تننگا۔ شراکت داری و پارٹنرشپ نا حکمت عملی ءِ تینائی کرسا قومی سیوت و شونداری ءِ پک کننگے۔ بلوچستان نا شونداری تون پاکستان نا شونداری گنڈوک ءِ‘ نیاڑی و راج انا محروم تپّہ غاتے بنجائی دنگ اٹ اتنگ کن حکومت پبی کوشست کننگ اٹی ءِ۔ وزیراعظم پرمان کرے کہ بنجائی و صوبائی ادارہ غاک رپورٹ اٹ تروک سلاہ تیا عملدرآمد ءِ پک کننگ کن گام گیج کیر۔ وزیراعظم محمد شہباز شریف تون بلوچستان نا طالب علم آتا غاو تا بابت ٹہیفوک کمیشن تدوک آدے اسلام آباد اٹ اوڑدہی کرے‘ کمیشن وزیراعظم ءِ بلوچستان آن تعلقدار طالب علم آتا غاو و اوفتے ایسر کننگ نا بابت کمیشن ناکنڈآن جوڑ کروک رپورٹ آ بریفنگ تس۔ وزیراعظم کمیشن نا کارکڑد نا سفت ءِ کرسا پارے کہ بلوچ طالب علم آتا غاو و اوفتے ایسر کننگ نا بابت رپورٹ بھاز سرجم ءِ وبھایمانداری و سنجیدگی اٹ جوڑ کننگانے۔ وزیراعظم پرمان کرے کہ بنجائی و صوبائی ادارہ غاک رپورٹ اٹ تروک سلاہ تیا عملدرآمد ءِ پک کننگ کن گام گیج کیر‘ او پارے کہ طالب علم آتا ویل و غاو تے ایسر کننگ کن ہر وڑ انا گام گیج کینہ‘ او مستی پارے کہ بلوچ طالب علم آک پاکستان نا میرات ءُ و اوفتا آسودہی و شونہالی ٹی پاکستان نا شونداری ءِ۔ وزیراعظم پارے کہ قومی سیاسی سرکڑدہ غاک بلوچستان نا الس ءِ امن‘ سنگتی و شونہالی نا کلہو تننگ اٹی ءُ‘ او پارے کہ بلوچستان نا کل ویل آتتون اوار خاص وڑ اٹ مسنگ پرسنز نا ویل ءِ ریاست ناکل اسٹیک ہولڈر آک اوار تولسا ایسر کیر‘ او مستی پارے کہ مسنگ پرسنز نا بابت آئین وکانود نا دنگ اٹ جوان گام گیج کننگے‘ اوپارے کہ شریداری نا حکمت عملی ءِ تینائی کرسا قومی سیوت و شونداری ءِ پک کننگ مریک۔ وزیراعظم پارے کہ بلوچستان نا شونداری تون پاکستان نا شونداری گنڈوک ءِ‘ او پرمان کرے کہ بلوچستان نا شونداری کن شونداری فنڈ تننگ ءِ پک کننگے۔ وزیراعظم پارے کہ نیاڑی وراج انا محروم تپّہ غاتے بنجائی دنگ اٹ اتنگ کن حکومت کوشست کننگ اٹی ءِ۔ اوڑدہی کروک آتے ٹی کمیشن نا کنوینئر قومی اسمبلی نا باسک سردار اختر مینگل‘ باسک آتے ٹی سینیٹر مشاہد حسین سید‘ سینیٹر کامران مرتضیٰ‘ افراسیاب خٹک‘ناصر محمود کھوسہ‘ میجر (ریٹائرڈ)حسنین ایڈیشنل سیکرٹری سینیٹ اوار ئسر‘ اوڑدہی نا وخت آ بنجائی وزیر دفاع خواجہ آصف‘ بنجائی وزیرداخلہ رانا ثناء اللہ‘ بنجائی وزیر کانود و انصاف اعظم نزیر تارڑ‘ سلاہکار وزیراعظم احد چیمہ و تعلقدار بڑزکو سرکاری افسر آک ہم ساڑی ئسر۔ بلوچستان نا طالب علم آتا غاو تا بابت کمیشن ءِ اسلام آباد ہائی کورٹ نا پرمان آ ستمبر 2022 اٹ جوڑ کننگاسس۔

(آن لائن)