تفنگری و بے وسی
سدرہ حبیب
چلہ نا یخ تینا وس آ ئس۔ دا یخ انگا نن تے ٹی کس ہم تینا باسن انگا اُرا تیان پیشن مننگ نا جیرت خنتوکہ۔ جمرک برف انا وڑ تفیسر۔ تو گڑا خبر الو ہراتم برف کروسس۔ ہندا یخ انگا مرغن انگا نن تے ٹی بابو امیر بخش تینا کوٹھی ٹی اسہ متکن ءُ کٹ اسے آ لیٹوک ئس۔ کوٹھی نا حالیت سفا پاش ئس۔ درگہ، دریچہ و روشن دان ختم ئسر، یخ انا زور ءِ توننگ دافتا وس آن پیشن ئس۔ کوٹھی ہم متکن ئس کہ جاگہ جاگہ دیوال نا تے مشک تماسر، چھت تے نزور ئس۔ کو ٹھی نا اسہ نیمہ غا بابو نا کٹ تخوک ئس، و ایلو نیمہ غا متکن ءُ کرسی اس تخوک ئس۔ ولے او بابو نا کاریم نا الو انتئے کہ سال اسے آن زیات مرسا ئس بابو نا بدن نا اسہ نیمہ غا تہو انا الامہ مسوسس۔ ہرانا سوب آن او بش توڷ اسے نا ہم اَلو۔
کوٹھی نا ایلو پارہ غا اسہ چنکو گیس ہیٹر اس لگفوک ئس، ہرانا کوشست ئس کہ دا طوفانی آ یخ ءِ کم کے۔ ولے او دا کوشست اٹی دا سو تڑوک آ یخ انا مون آ سرشاد مننگ کتوکہ۔
بابو نا کوٹھی نا دیوال آ اسہ ورنا اسے نا فوٹو اس ٹنگوک ئس، ہرا کہ اسہ زیباو طاقتور ءُ ورنا اس خننگاکہ۔ بروت آک وَل تروک، پیہن انگا رنگ و اوڑا پینگن ءُ ریش، کاٹم آ دستار و خن تیٹی رعب دار ءُ خیسنی دا ورنا نا زیبائی ءِ ودفنگ ئس۔ بابو نا کل مڈی کس پاہے ہندا فوٹو ٹی ساڑی آ ورنا ئس۔ اسہ کٹ آ تموک کمزور انگا بدن و پیری نا معذوری نا دا حالیت اٹی بابو سرنگ تو کتوکہ، ولے ہندا فوٹو آ ہرسا وار اس بشخندہ کریکہ، وار اس خنک تے خڑینکی مرسا ہنارہ۔
دن الو کہ بابو نا حالیت بھاز مہالو ناسے داوڑ ئس، دا تو منہ سال مست انا ہیت اسے۔ سرکاری نوکری، بھلا گاڈی، نوکر چاکر، دراخ و کانڈا غا جون، ہر گڑا بھاز ئس۔ سیال دوست عزیز ہرکس نا باٹی بابو نا ہیت و سفت آک ئسرہ۔
بابو ءِ دا کل گڑاک اسہ کچ اس اسکان مغرور کریسر۔ ولے وخت بے پرواہ نا کاریم گدرینگے تو او گدرینگسا کاہک۔ کس انا اودے پرواہ اف۔ بابو نا ہم جوان انگا وخت گدرینگا۔ اونا زندگی ہم چلہ نا مون انگا بھلا نن تا وڑ تارمہ مرسا ہنا۔ نوکری ہنا تو پدا دراخی و ورنائی ہم ہنا۔ کل گڑاک اسٹ اسٹ آ بابو آن ہنسا کریر و پیری ضعیفی و بیماری اونا نصیب جوڑ مس۔
ہمو ہم وخت ئسر کہ بابو نا کوٹھی آن مخنگ و ٹاکو تا توار نن نیمہ اسکان بسکہ، و داسہ ہمو بابو امیر بخش ءِ کہ ہیت اسے کن سکک۔ نئے سیال نئے دوست عزیز بلکہ جند انا حقی آ اولیاد آک ہم اونا سوج کپسہ کہ زندہ اس یا آخا؟
اینو ہم بابو دا مون انگا تارمہ غا نن تیٹی تینا ورنائی نا دے تے یات کرسا دا سو تڑوک آ یخ اٹی تینا دے تے گدریفسا موت انا انتظار اٹ کٹ آ لیٹوک بیوسی پیری کمزوی و بیماری تون مون ترسا ئس کہ ہراتم دا مون انگا نن اٹ او دا زند انا قید آن آزاد مرے۔
ہفتئی تلار
تاک:06
11-05 فروری 2022ء
پنہ: 05