ننا ماما

تانکہ ننا ماما بے کار ئس، زمواری تیان آزات ئس۔ اوڑتون جنگ و جھیڑہ کن وخت بھاز ئس۔ دن ءُ دے اس اَلو کہ ماما کس انا بامس ءِ دتر کتنے، یا کس اس ماما نا بامس ءِ پرفتنے۔ میڑھ مرکہ، بے بختی تیان گڈ اسہ بلہ اس سیم مسکہ تو پین بلہ اس بش مسکہ۔ اونا جھیڑہ غاک انت اسے آن بنا مسرہ۔ کس انا مہمان اس بسکہ، منہ ساہت اکن گاڈی ءِ اُرا نا مون آ سلفیکہ۔ ماما ءِ بد بسکہ۔ بس غم اس جوڑ ئس۔ ہمسائے نا مارکو تیان کس گلی ٹی سلوک مسکہ، ماما ہمو الو ترختوکہ۔ ریڑھی، کلفی، و پاپڑ سودا کروک آ درگہ نا مون آ سلیسکہ توار خلککہ، ماما ءِ خناسہ شت اسے تون پیش تماکہ۔ کس رد اٹ بسکہ درگہ ءِ ٹکیفیکہ، پین کس انا اُرا نا ارفیکہ، ماما نا ترندی آسمان آ سر مسکہ۔ دیر انا زی آ وال مین تون اونا جنگ، قصاب تون ران انا سو اٹی چھانپ اس شاغنگ آ خر کریکہ۔ دا ایلو معاملہ غاتے اِلے کہ ششہ سے نا وخت آ چنا نا پن آ او ہڑنگی شاغاکہ۔ سانگ و برام آتیٹی دیر ءِ بٹنگ انگے، و دیر ءِ بٹنگ انگپ، اونا فیصلہ ءِ کس منتو تو ڈغار آسمان ءِ اسٹ کریکہ۔ بس ماما اس اَلو خاخر ءُ لمبہ اس ئسکہ۔ سردار و ٹکری نا ءِ اللہ بنگوسس، اوفتا وخت ہم تیر ئسکہ۔ ایلو قبیلہ و قوم انا بندغ آک دا ہیت آ خوش ئسر کہ نن تون ہم گنوک آتا کمتی اف۔ اوفک مدام ماما نا آمخی تیا اودے شاباسی ہم تسرہ کہ جوان ءِ امبل ءِ پنجہ بونڈا کریس۔ پین مف ننا قوم و قبیلہ ہم تو یات مریک۔ دن مف تو دیر دیر ءِ منک۔ قوم و قبیلہ سے نا پارہ غان زیات چپ مننگ لغوری ٹی بریک۔ ہندا پنجہ بونڈا تیا تو ہرکس ننے و ننا قوم و قبیلہ ءِ یات کیک۔ اللہ نا شکر ءِ کہ ماما نا چناک بے بختی اٹ چار جماعت خوانار۔ داسہ خوانندہ غاتیٹی توسرہ تو اوفتا ابا نا ترندی و بھاز انگاتتون بیدادی تیا ہیت مسکہ۔ تو اوفک مچٹ اس شکی مسرہ۔ اخیر ایلمک سلاہ کریر۔ ابا کن خلق آن پیشن اسہ دکان اس خلنگے، تاکہ ابا اختہ مرے۔ اخیر دکان اس ملار۔ و جائی ماما دکان اٹی ہندن اختہ مس کہ داسہ اودے کاٹم نا خواریفنگ کن وخت ملتوکہ۔ بازار و مارکیٹ آتیان مال اتنگ، سودا تیٹی ہندن اختہ مس کہ ماما ئس و پیسہ غاتا حساب ئسکہ۔ سہب اتون ہناکہ، شام اتون بسکہ۔ چنکو منکو ہیت اس مسکہ ماما ءِ اسہ دم خیال بسکہ، اگہ دکان کنا منہ دے بند مس یا میڑھ مرکہ غاتیٹی و تھانڑو کچاری تیا مون تما تو بھلو نسخان اس مرو ءِ۔ بس داسہ چنکا چنکا ہیت آتیا اسُل ہُرتوکہ، او چندی ہیت آتے تو دا خف آن بنگکہ، ایلو خف آن کشاکہ۔ ماما نا اختہ مننگ آن شار و خاہوت نا بندغ آتے آسودہ ئی اس نصیب مسوسس۔ بلکن ماما داسہ تو خیر انا کاریم تیٹی ہم مون مون ئس۔ جاگہ اس پیسہ خڑچ کریکہ، جاگہ اس خیر اکن برنج و سو تننگ ءِ ثواب تکاکہ۔ ہندا نیام اٹی ماما حج کرے۔ داسہ او ئسکہ، مسیت و نماز آک ئسرہ۔ مچ آ دنیا ماما نا نیک مننگ آ خوش ئسکہ۔ اگہ خوش اَلو، تو سردار و ٹکری اَلوسہ۔ دا سوب آن کہ ہرا بندغ تینا جھیڑہ غاتیٹی اوفتے مون شاغاکہ، فیصلہ کرفیکہ، داسہ ماما نا حج کننگ، نماز آک و پیسہ غاک بھلا چنکا جھیڑہ غاتا خیر اٹی کاریم بسرہ۔ پدا بے فائدہ نا جنگ و جھیڑہ غاتا داخو بھلو آزموندہ اس کہ ماما تون ئسکہ، پین کس اتون اَلو۔ او تو چندی فیصلہ غاتے کرسا تینا آمخی نا مثال ءِ ہم تسکہ۔ ہندا سوب آن اونا ہیت آتیان جنگ و جھیڑہ غاک خلاس مسرہ۔ سردار و ٹکری ہندا انتظار اٹی ئسر کہ چوخت ماما نا دُو آن جنگ اس بش مرے، بلکن چندی جھیڑہ غاتیٹی اودے گرنگ نا ہم کوشست کریر، ولے ماما ءِ وخت انا جوان وڑ اٹ کاریم اٹ اتنگ بسوسس، اول وخت انا ہُلی اوڑا سوار ئس، داسہ او وخت انا ہُلی آ تولوک ئس۔ دا بننگ تون ٹکری و سردار پین زیات مونجا مسر ہراتم سما تما کہ ماما انجمن تاجران نا تینا بازار نا صدر جوڑ مسنے۔ داسہ تو ماما راہشون آتیٹی حساب مسکہ۔ اخبار اٹی ماما نا فوٹو و بیانک شینک مسرہ۔ ماما بے مٹ ءُ بندغ اس جوڑ مسوسس۔ خلق انا ہر اولیاد، گل زادہ غاک تینا پیر انگا و بے کار آ بندغ آتے اختہ کننگ کن مشغولی پٹنگ اٹی ئسرہ۔ تاکہ بے کار نا دو آن ودی مروک آ جنگ و جھیڑہ غاک مدامی کٹر۔

کتو تے خدا…. ناگمان کورونا بس، کاروبار آک بند مسر…. اسیکا پدا ماما بے کار مس۔

ہفتئی تلار

تاک: 30

01-08 August 2020

پنہ : 01