سری لنکا نا بھارت ءِ انگلینڈ نا برخلاف سیریز کن مہمانداری نا سلاہ

کولمبو (مانیٹرنگ ڈیسک) سری لنکا بھارتی کرکٹ بورڈ ءِ انگلینڈ نا برخلاف سیریز نا مہمانداری نا سلاہ خلک۔ بروک آ سال اٹ انگلینڈ بھارت نا دورہ ءِ کیک ہراٹی پنچ ٹیسٹ میچ شیڈول ءُ ولدا ہم کورونا حالیت آتا سوب آن انگلش ٹیم بھارت اٹ گوازی کننگ اٹ زیات اُست خواہی تخپک۔ سری لنکن میڈیا رپورٹ آتا رداٹ سری لنکن کرکٹ بورڈ بھارتی بورڈ کمامدار آتون حال احوال کرسا اوفتے دا سیریز سری لنکا ٹی گوازی کننگ نا درخواست تسنے، امریکہ و برازیل آن پد بھارت اٹ کورونا کیس آتا کچ کل آن زیات ءِ، سری لنکن بورڈ داکان مست آئی پی ایل میچ آتا مہمانداری ءِ کننگ ہم اُست خواہی نا درشانی ءِ کریسُس ہرادے بھارتی بورڈ پورو کتو۔ یات سلے کہ بھارت کورونا کیس آتا بابت اٹ دا وخت آ دنیا نا مسٹمیکو کل آن زیات زہمی آ ملک ءِ، ہراڑے زہمی آ بندغ آتا کچ  23  لکھ اسکان سر مسنے و اوڑے لکھ آتا کچ ہم 44 ہزار اسکان سر مسنے۔ بھارت اٹ کورونا آن زہمی آ بندغ آتا کچ امریکہ و برازیل نا مقابلہ ٹی کم ءِ ولے بھارت اٹ کہوت آتا کچ ءِ بھاز کم پاننگ انگ ءِ۔ بھارت اٹ کورونا نا کیس آک شاری آ علاقہ غاتیان چُنکا شار و خلقی آ علاقہ غاتیٹی تالان مننگ اٹی ءُ او طبی بنداو مالو آن پریشر نا گواچی ءِ۔ یات سلے کہ بھارت اٹ سخت لاک ڈاؤن آن پد مرحلہ ٹی پابندی تے کم کننگانے ہرا 25 مارچ آ نافذ کننگاسُر۔