بولان ادبی دیوان نا مشاعرہ

محسن فگار

0

Get real time updates directly on you device, subscribe now.

مچھ بولان تاریخی ءُ شار اسے آن ایڑتر ادب و سیاست نا پڑ آ ہم اسہ گیر اسے آن وسم ءِ، ہر دور و ہر کرن اٹی دا جاگہ نا باتیک تینا راج و تینا بولی تا شونداری کن مخ تفوک مسنو، تدوک آ دور انا خزم خواجہ غاتا رد و ریسہ ءِ برجا تخسا اوفتا کاروان ءِ مون مستی دننگ کن بولان ادبی دیوان مچھ بولان نا ہمو اسٹ انگا ادبی تنظیم ءِ، ہرا کیہی سختی سوری تتون سینہ ترسا اسہ بھلو پند اس خلسا بے گڑتی و چرت آن تینا مزل نا پارہ غا چسپانی اٹ گام کننگ ءِ۔

بولان ادبی دیوان نا ادبی کاریمک تیوی راج انا مون آ پاش ءُ، بولان نا مہروان آ مخلص آ سنگت آک تینا مدت و کمک اٹ ہر سال ”تیوی بلوچستان سیمینار“ اڈ ترسا بننگ ءُ۔ داکان بیدس پنی آ عالم دین ابن صفر شاہ صاحب نا کتاب ”شنز“ ءِ ہم شینک کرسا اسہ تاریخ اس رقم کریر۔

تینا کاریم تا رد ءِ برجا تخسا گدرینگوک آ دے تیٹ بولان ادبی دیوان نا بن ہنیکن اٹ تنظیم نا چیئرمین گل شہزاد نا کماشی ٹی اسہ مشاعرہ اس اڈ ہلک، ہرانا گچین آ مہمان کامریڈ قیوم کرد ئس۔ اعزازی مہمان تیٹ کامریڈ عنایت بلوچ و منظور ہاشم اسک ئسر۔ مشاعرہ نا بناءِ تلاوت کلام پاک آن کننگا، ہرانا بختاوری ءِ مچھ انا پنی آ کہنہ مشق شاعر تنظیم نا جوائنٹ سیکرٹری نواز تشنہ کٹا، شونکاری نا دود آتے مچھ انا شان پنی آ شاعر جنرل سیکرٹری جنرل منیر غمخوار دوئی کرے۔

مشاعرہ غان گچین آ مہمان قیوم کرد تران کرسا پارے کہ سینئر سنگت آتے بایدے کہ جونیئر سنگت آتا است بڈی ءِ کرسا جوان وڑاٹ اوفتا راہشونی ءِ کیر تاکہ او مون مستی زیبائی اٹ تینا لائخی تا درشانی ءِ کیر۔ او پارے اینو نا شاعری ٹی ہمو گڑا اف ہرا کہ درو نا شاعری ٹی خننگاکہ، درو نا شاعری نا خول اٹ اسہ بسنی اس خوندی ئس، اینو نا شاعری ننے سرسری لگک۔ او پارے دنکہ فرانس اٹ انسانی مڈول اس نہادی خوار تیٹ بھاز زیبائی اٹ جوڑ کننگا، کیہی سرمایہ غاک اوڑا خڑچ مسر، ولے ہراکہ گدرینگوک آ کرن آتیٹ انسانی مڈول دو انا خواری اٹ نقش و نگار مسرہ، دا مشین تیٹ جوڑ مروک آ مڈول آک اوفتا بریبری ءِ کننگ کتوس۔ او پارے کنا پاننگ نا مسخت دادے کہ درو نا شاعر آک تینا ریاضت و مطالعہ نا خمیر ءِ تینا شاعری ٹی درشان کریرہ، ہندا سوب آن اوفتا شاعری تیٹ پختگی ئس، تو اینو شاعر آک بایدے اوفتے خوانسا اوفتیان ہیل کیر۔ او تینا تران نا گڈ سراٹ کل انا منت ءِ ہرفے۔

کامریڈ عنایت بلوچ تران کرسا پارے اینو نا دا کچاری ٹی ساڑی مننگ کن کن بختاوری اسے کہ دا زیبا غا کچاری ٹی ساڑی مسٹ نما زیباغا شاعری تے بنگٹ۔ او پارے ای بولان نا سنگت آتا مخلصی ءِ سلام کیوہ۔ او ادب نا شونداری کن بلا ناغہ کاریم کرسا بننگ ءُ۔ گڈ سر اٹ بولان نا سنگت آتا منت ءِ ہرفے۔

ارٹمیکو اعزازی مہمان منظورہاشم تران کرسا پارے کہ بولان ادبی دیوان مچھ انا ہمو متکن آ اسٹ انگا تنظیم ءِ ہرا کہ مچھ کون انگا پد تموک آ شار آن براہوئی ادب نا نمائندگی ءِ گچین وڑاٹ کننگ ءِ۔ داکان بیدس دا جاگہ نا ورناتیٹ ادبی شعور ءِ ہم ودفنگ ءِ۔ او پارے کہ بولان ادبی دیوان نن کن مچھ اٹ اسہ خوش بختی اسے۔ گڈ سر اٹ کل سنگت آتا منت ءِ ہرفے۔

و ہندن مجلس نا گڈ سر اٹ تنظیم نا چیئرمین کہنہ مشق سینئر شاعر گل شہزاد کل ساڑی سنگت آتا منت ءِ ہرفے۔

مشاعرہ ٹی ساڑی سنگت آتا پنک داوڑ ءُ:

گل شہزاد، گچین آ مہمان کامریڈ قیوم کرد، اعزازی مہمان کامریڈ عنایت بلوچ، اعزازی مہمان منظور ہاشم، ستارسیلانی بلوچ، نوازتشنہ، منیر غمخوار، عبدالنبی انجم، جہانزیب زیبی، الطاف الطافی، راشد جانان، ضیاءالحق فراز، محسن فگار۔

ہفتئی تلار،

تاک25

27 June 2020

پنہ، 3

Get real time updates directly on you device, subscribe now.

Leave A Reply

Your email address will not be published.