بابر اعظم نا تینا 8 سال نا شیدائی سے تون ویڈیو آ اوڑدہی
Get real time updates directly on you device, subscribe now.
لاہور (مانیٹرنگ ڈیسک) کوویڈ19 نا سوب آن پاکستان و انگلینڈ نا نیام اٹ 5 اگست آن بنا مروک آ ٹیسٹ و ٹی 20 سیریز بائیو سیکیور ماحول اٹ گوازی کننگک۔ بند درگہ غاتیٹی شیڈول دا سیریز اٹ گوازی نا کل آن اہم انگا اسٹیک ہولڈر، شیدائی کرکٹ، انکلوژرز تیٹی تولسا تینا اُست پسند آ گوازی گرتا اُست خواہی ءِ کننگ کپسہ۔ گوازی گر و شیدائی تا نیام اٹ دا مری تے مُر کننگ کن پاکستان کرکٹ بورڈ انگلینڈ اٹ ساڑی چمپئن بیٹسمین بابر اعظم و لاہور اٹ ساڑی اونا 8 سالی آ شیدائی نا نیام اٹ اسہ ویڈیو کانفرنس اس اڈ ہلک۔ بابر اعظم نا شیدائی سامعہ افسر ءِ اسہ کرکٹ فین اسے نا وڑاٹ ہمو وخت آ پن رسینگا ہراتم سال انا بنا ٹی اونا نیٹ آ شاندار بیٹنگ نا ویڈیو سوشل میڈیا آ وائرل مسوسُس۔ دا ویڈیو ٹی چُنکا کرکٹر ہر بال آ جوان ءُ اسٹروکس گوازی کننگ آ خننگا۔ او وخت آ سری لنکا تون کیپٹن و ایم سی سی نا ساڑی صدرصدر کمار سنگاکارا سوشل میڈیا آ وائرل دا ویڈیو آ کمنٹ کرسا پارینے کہ چُنکا گوازی گر نا ویڈیو آن مُر تدینگ انگ کننگ کپرہ، اونا تکنیک اوڑان ہم جوان ءِ۔ وخت اس کہ اودے کرکٹ اٹ داوڑ نا ٹیلنٹ ءِ خننگ آن پد اُست خواہی رسینگا۔