امریکی محکمہ خارجہ کا ڈَل جمعہ نا دے پاکستان آ بریک

اسلام آباد : امریکی محکمہ خارجہ نا قونصلر ڈیرک شولے ناکماشی ٹی امریکی محکمہ خارجہ نا ڈل پگہ جمعہ نا دے 17 فروری آ پاکستان آ بریک۔ امریکی محکمہ خارجہ نا قونصلر ڈیرک شولے تینا پاکستان نادورہ نا وخت آ سینئر پاکستانی کمامدار آتتون اوڑدہی تے ٹی اہم انگا امور تیا گپ وتران کیک۔ امریکی بڑزکو کہولی ڈل انا بننگ نا مسخت پاک امریکہ اقتصادی تعلقداری تے سوگو کننگ‘ دہشت گردی تور کمک ءِ ودفنگ و موسمیاتی تنکی نا زہم تتون مون تننگ کن کمک نا کوشست آتے ٹی کمک کننگ ءِ۔ تینا دورہ ناو خت آ امریکی محکمہ خارجہ نا قونصلر ڈیرک شولے نا وزیرِاعظم شہباز شریف و وزیرِخزانہ اسحاق ڈار تون اوڑدہی کننگ نا گمان ہم ارے‘ حوالی نا رد اٹ تینا دورہ نا وخت آ امریکی محکمہ خارجہ نا سینئر عہدیدار آتا ڈل انا آرمی چیف جنرل عاصم منیر تون اوڑدہی نا گمان ہم ارے۔ امریکی محکمہ خارجہ نا قونصلر بڑزکو کہولی ڈل اتون اوار اسلام آباد اٹ بڑزکو کہولی کمامدار‘ سول سوسائٹی نا باسک و واپاری راہشون تتون ہم اوڑدہی کیک‘ دا اوڑدہی تا مسخت تین پہ تینی شریداری تا اہمیت ءِ مون آ اتنگ و ہڑتوم آ ملک آتا اسیجائی ہدف ءِ پک کننگ ءِ۔ داکان مست امریکی محکمہ خارجہ نا کنڈآن پاننگاسس کہ 14غان 18 فروری اسکان ڈیوڈ شولے ناکماشی ٹی ڈل بنگلہ دیش و پاکستان نا دورہ ءِ کیک۔ ایلو کنڈ آ پاکستان اٹ امریکہ نا سفیر ڈونلڈ بلوم پارینے کہ امریکہ 32 ڈٹ آتیکن پاکستان ءِ فنڈ تننگ اٹی ءِ‘ لاہور اٹ شاہی قلعہ غا بننگ ناوخت آمیڈیا تون ہیت وگپ کرسا او پارے کہ دا ڈٹ آتا بحالی کن گچین گام گیج کننگ انگء ِ‘ امریکی سفیر پارے کہ شاہی قلعہ ٹی ہم 7 سائٹ آ کاریم مننگ ءِ‘ ملین ڈالر اٹ 7ہند انا بحالی ءِ پک کننگک۔ او پارے کہ پاکستان اٹ انٹرن شپ پروگرام نا کمک اٹ طالب علم آتا ربیدہ و اوفتا بحالی ءِ ہیل ایتنہ۔ امریکی سفیر دا ہم پارے کہ نن پاکستان تون تینا تعلقداری تیا گمر کینہ۔

(آن لائن)