رخشان ادبی کاروان نا اِرٹمیکو ہفتئی مشاعرہ

 

رخشان ادبی کاروان نا ہفتئی ارٹمیکو مشاعرہ نا بنا تلاوت قرآن پاک آن مس۔ تلاوت نا بختاوری ءِ خواجہ مولوی محمد اکبر آسی دوہی کرے، تلاوت آن پد مشاعرہ بنا کرے۔مشاعرہ  نا خاص انگا مہمان گچین آ شاعر و ادیب محسن بسمل ئس۔ او تینا ہنین آ ہیت آتے کرسا پارے کہ داکل سنگت آتا مہر ءِ کہ اوفک ننے داخس شرف بشخار۔ ننے عزت تسر۔ او مستی ہیت کرسا پارے کہ تینا پروگرام و مشاعرہ غاتے ہندا وڑ مستی درسا کبو۔ خواجہ آخر اٹی رخشان ادبی کاروان نا کل سنگت آتا منت ءِ ہرفے۔و رخشان ادبی کاروان نا سرسہبی کن دعا کرے۔

مشاعرہ نا کماشی ءِ رخشان ادبی کاروان نا نائب صدر انور زیب پنجگوری کرے۔ انور زیب ہیت کرسا پارے کہ دُن انگا مشاعرہ تیٹی بشخ ہلسا کبو نما شاعری پین جوان مریک۔ نما خیال پین ودک۔

مستی ہیت کرسا پارے کہ جوان انگا شاعر ہراوخت آ شعر پاہک تو بنوک آتا است آن اسہ باف اس پیش تمک۔ است ہندن یخ مریک دن کہ پوغ آ دیر شاغس گِڑاس مثال ترسا پارے ننا راج اٹی ہندن ءُ شاعر ارے ہرا وخت آ شعر پارہ تو پھل آک تینا با ءِ ملرہ۔ہر بندغ خف تورک۔ او مثال تس پارے دن کہ ننا خواجہ استاد ملک حبیب اللہ حبیب مرے، استاد خواجہ صابرندیم، ڈاکٹر عالم عجیب، خواجہ شہزادنزیر، ولی ساسولی، خواجہ ساجد زیب پنجگوری یاکہ سبک عمر آ سنگت سعید فیض پنجگوری۔ ای داسوب آن دافتا مثال ءِ تسٹ دا خواجہ غاک محنت کرینو۔ خواری کشانو اینو نن نم دافتا پِن تے ہلینہ دا اوفتا محنت نا بھرم ءِ۔

مستی ہیت کرسا پارے کہ رخشان ادبی کاروان پنجگور نا کل سنگت آتا منت ءِ ہرفوہ کہ

جوان ءُ وڑو ڈول اسیٹ مشاعرہ ٹی بشخ ہلکُر۔

مشاعرہ نا جارچین رخشان ادبی کاروان نا خازن کریم اسیر پنجگوری گچین ءُ وڑ و ڈول اسیٹ مشاعرہ ءِ سر تس۔ کریم اسیر پارے کہ ای خواست کیوہ کل شاعر آتیان دُن انگا مشاعرہ غاتیٹی بشخ ہلساکیر۔

مشاعرہ ٹی شعر بنفوک آشاعر آتا پنک داوڑ اٹو:

کریم اسیرپنجگوری

ننااست اٹ ننا ویدن متو ہم

ننا بخت اٹ نمادیدن متوہم

صدام رضاء پنجگوری

ننے دے ہُرانے نگاہ ٹی ہمو نا

وفا ہم بکار ءِ وفا ٹی ہمو نا

غلام حسین اطہر

ای زو زو رند اٹی گام کیوہ

نا یات اٹ سہب ءِ تینا شام کیوہ

آصف جوہر

مسڑ بھاز غاوی ءِ نے آن حوا نا

مفن دن کہ چیرگیج کور ءُ سے نا

اکبرآسی

بر مرینک دولخی ساہ ای و نی

پیش تمن میدان آ زیبا ای و نی

قمرانجم

است اٹی او ہراتم سفا مسنے

بیوفا ءِ چڑہ بیوفا  مسنے

غفارآفتاب پنجگوری

مدامی عشق دن برجا سلیپک

چڑہ وا مہرانا کسہ سلیپک

سعیدفیض پنجگوری

کل انا غم تا مالک ئسن فیض

کس ننے اینو مالکی کتو

ثناء آزادپنجگوری

او نی اُس کہ ہر ہیت آ سدخہ اُس کل اکن

دا ای اُٹ کہ بیدس نے آن کستنٹ کس اکن

سکندرمعاویہ

خنتنٹ خن تے نا پھل نقاب ءُ چڑہ

پہہ مفیسہ۔۔۔۔ نن کن عزاب ءُ چڑہ

ساجدزیب پنجگوری

ہوغفے سنگت ءِ سنگتی وانما

دو بتو ہم ننے دولخی وا نما

محسن بسمل

اردو کلام اس بنفے

انورزیب پنجگوری

ننا بخت ءِ کم بخت ننا شار ءِ خاخر

ننا گلزمین نا دا سینگار ءِ خاخر

مشاعرہ ٹی رخشان ادبی کاروان نا باسک آک جوان ءُ کچ اسیٹ بشخ ہلکر تینا گچین انگا خیال آتے شعری دروشم اٹی پیش کریر گڑاس سنگت آک سفر و تینا ذاتی مجبوری و اختئی تا سوب آن بشخ ہلنگ کتوس ولے نن اومیت کینہ کہ ننا کل سنگت آک بروک آ مشاعرہ ٹی جوان ءُ وڑ اسیٹ بشخ ہلور۔

ہفتئی تلار
تاک: 39
22-16 اکتوبر 2021ء
پنہ: 04