سردار عطااللہ مینگل نا وصیت نا مسخت
وحید ہمراز، بسیمہ
بلوچستان نیشنل پارٹی نا کماش سردار عطاء اللہ مینگل 1929 ٹی وڈھ اٹی سردار رسول بخش مینگل نا اراٹی ودی مس۔ بزرگ بلوچ قوم پرست راہشون سردار عطاء اللہ مینگل نئے بیرہ قومی بلکہ جہانی سیاست کریکہ۔ او غٹ قوم آتا حق انا ہیت ءِ تینا آخری دے تِسکان کریکہ۔ او اسہ زندہ اُست ءُ بندغ اس ئسّک۔ہرا خان نوری نصیر خان ءِ تینا آئیڈیل پاریکہ۔
سردار عطاء اللہ مینگل یکم مئی 1972 آن 13 فروری 1973اِسکان بلوچستان نا اوّلیکو وزیر اعلیٰ ئس۔ نہہ تُو نا مچٹ انگا وخت اٹ او بلوچستان اٹی انقلابی ءُ بدلی ایس۔ او جامعہ بلوچستان کوئٹہ، انجینئرنگ جامعہ خضدار ایلو بلوچستان بورڈ آف انٹرمیڈیٹ سیکنڈری ایجوکیشن کوئٹہ نا بنداو ءِ تخا۔ اوکان مست بلوچستان نا دہ و دوانزدہ نا امتحان تے ملتان بورڈ ہلککہ۔ مخلوق بھاز خوار مسکہ۔
1973نا دے وزیراعظم ذوالفقار علی بھٹو بلوچستان اٹی گورنر راج خلک و سردار عطاء اللہ مینگل نا حکومت ءِ چُٹفے۔ بلوچستان اٹی فوجی آپریشن کننگا۔ بلوچستان اٹی فوجی آپریشن ءِ منپننگ نا سوب آن سردار عطاء اللہ مینگل ءِ بھلو وخت اس جیل آتیٹی تدیفوئی تمّا۔ داخہ سال جیل اٹی بند مننگ آن پد ہم او تینا اصولی آ گپّ آتا سلوک ئس۔
اوکان گڈ او بھلو وخت اس پیشن نا ملک آتیٹی ملک بدر مس۔1990 ٹی ملک بدری آن پد ولدا پاکستان آ بس۔ اوکان گُڈ او بلوچستان اٹی قومی سیاست ءِ مون آ اتنگ کن بھلو جہد اس کرے و سرسہبی ہم دوئی کرے۔
6 دسمبر 1996 اٹی او غٹ قوم پرست جماعت آ تے اوار کرسا بلوچستان نیشنل پارٹی نا بنداو ءِ تخا۔ 1997 انا گچین کاری تیٹی بلوچستان نیشنل پارٹی بلوچستان ٹی بھلو کچ اسیٹ سرسہبی دوئی کرے۔ 22 فروری 1997ء اٹی بلوچستان نیشنل پارٹی نا راہشون سردار اختر مینگل بلوچستان نا وزیر اعلیٰ گچین مَس۔۔۔۔۔۔ سردار اختر جان مینگل 19 تُو اسکان بلوچستان نا وزیر اعلیٰ مس۔ بس انت وڑ اسیٹ بنجائی حکومت تون ٹہیپننگ نا سوب آن جولائی 1998ء اٹی سردار اختر مینگل حکومت آن دو ہرفے۔
بلوچستان نیشنل پارٹی نا قومی کونسل سیشن اٹی خواجہ غا تا نا ٹہنگی نا سوب آن بلوچستان نیشنل پارٹی اِرا ٹکر مس۔ اوفتا بھلو کچ اس ایم این ایک سردار عطاء اللہ مینگل تون ئسّر، مہیم خان بلوچ ایلو ٹولی نا کماشی ءِ کریکہ۔۔۔۔ 1998ء و 1999ء اٹی غُٹ مظلوم تپہ غاتا حق آ تیکن جہد کننگ کن پونم پلیٹ فارم نا بنداو ءِ تخا۔
پونم تحریک نا جلسہ و جلوس آتا رد اٹ 30 ستمبر 1998ء اٹی بابائے بلوچستان میر غوث بخش بزنجو اسٹیڈیم خضدار اٹی بھلو مُچّی اس کریر۔ او مُچّی ٹی ملکی لیڈر آتیان بھلو کچ اسیٹ تران کریر۔۔۔۔۔۔۔ اوکان پرویز مشرف 12 اکتوبر 1999ء اٹی ملک اٹی مارشل لا خلک و غٹ ملک اٹی سیاسی سرجز آتیا رکھ خلک۔
اوکان گڈّ پیری،ناجوڑی و نزوری نا سوب آن سیاست آن مُر تمّا۔۔۔۔۔۔۔۔۔۔۔ او 2 ستمبر 20221 نا دے سَے بجہ غا کراچی ٹی کزّیت کرے او بلوچستان نا سیاست نا دنیا نا اسہ بھلو درگہ اس مدامی کن بند کرے۔ 3 ستمبر نا دے سَے بجہ غا اودے اونا باوہ پیرئی آ خلق وڈھ انا شہدا قبرستان ٹی اونا وصیت نا رد اٹ جہہ ءُ جاگہ کریر۔
ایہن بلوچ آتیٹ قبر انا تنیا مننگ آ بندغ وساہت مریک۔ ولے دا عظیم انگا راہشون روایت آتے پرغا و تینا قبر ءِ تنیا کرے۔ ولے دا فیصلہ دن سٹی اف۔ بلکن دانا پد اٹ تاریخ اسے۔
سردار اختر مینگل پاہک کہ باوہ بزرگوار ہمو جاگہ کن وصیت کریسس ہراڑے کہ نوری نصیر خان نا فوج پڑاؤ کریسس۔ دن دا بھلا بندغ تینا قبر ءِ تنیا کرسا نوری و اونا کڑد ءِ تاریخ اٹ زندہ کرے۔
ہفتئی تلار
تاک: 34
17-11 ستمبر 2021ء
پنہ: 03
Bazz johan