طالبانک کابل اٹ پترینگار، کل ءِ بشخنگ نا پڑو

کابل: طالبانک اوغانستان نا دارالحکومت کابل اٹ پترینگ نا بناءِ کرینو، وخت اس کہ ترجمان طالبان پر امن وڑ اٹ پترینگ و کل ءِ بشخنگ نا پڑو کرینے، ملکی و در ملکی میڈیا رپورٹ آتا رد اٹ اوغانستان نا وزارت داخلہ پارینے کہ طالبانک کابل اٹی کل کنڈآتیان پترینگانو، سائرن لگنگ اٹی ءِ، و چارما کند آن سم کاری نا توار بننگ اٹی ءِ، وخت اس کہ ہیلی کاپٹر آک دانگ اینگ بال کننگ اٹی ءُ، ایلو کنڈ آ ترجمان طالبان پڑو کرینے کہ اوفک دارالحکومت ءِ زور انا زی آ کوزہ کننگ نا سجفتنو، و نئے کس اسے آن بیر ہلیرہ۔ مجاہد آک پترینگ نا جاگہ غا سلوک ءُ، وپر امن وڑ اٹ پترینگ انگ خوارہ، رپورٹ نا رد اٹ طالبان تا و کابل اٹی صدارتی محل نا سرکڑدہ غاتا نیام اٹ مذاکرات مسنے، و ویل انا ایسر اس کشنگ نا کل کسر تیا سجفنگ انگ ءِ۔ ہڑتوم آ کنڈ آتا است خواہی ءِ کہ اوغان فوج سلہہ بٹے، تاکہ کشت و خون مف۔ مذاکرات نا سرسہبی یا بے سہبی آن پد پترینگ نا کسر تیا سلوک طالبان جنگیڑو آتے دارالحکومت نا بنجا ٹی پترینگ نا پرمان کننگک، ایلو کنڈ آ دوحہ ٹی طالبان تا ترجمان نا پاننگ ءِ کہ کابل اٹی پترینگوک آ جنگیڑو آتے بیداد آن پاناد کننگ نا پرمان کننگانے، وخت اس کہ اگہ کس اس جنگ انا جاگہ غا امن کن اؤ کرے تو اودے ہننگ نا موکل تننگک۔ و نیاڑی تے رکھوک علاقہ غاتیٹی ہننگ نا کسر تننگک۔ رپورٹ نا رد اٹ طالبان جنگیڑو آتے بھاز کم اٹو مزاحمت اس مون تروک ءِ۔ کابل یونیورسٹی مہالو آن خورک کننگاسس، و ہاسٹل اٹی اڈ ہلوک کل طالب علم آک اُرا تیا ہنانو۔ الس اُرا تیٹی گٹ ءِ، ایلو کنڈ آ صدر اشرف غنی نا چیف آف اسٹاف ٹویٹر آ کابل نا مخلوق آ زور شاغانے کہ اوفک چرت خلپس۔ ہچ ءُ ویل اس اف۔ کابل نا حالیت ننا دوٹی ءِ، ولے مسہ اوغان کمامدار ایسوسی ایٹڈ پریس ءِ پارینو کہ جنگیڑو آک دارالحکومت نا کالکان، قرا باغ و پغمان ضلع غاتیٹی پترینگانو۔

(آن لائن)