سویلی پنجاب صوبہ غان مسہ کروڑ الس ءِ فائدہ مریک، میر ضیاءلانگو

کوئٹہ : صوبائی وزیر داخلہ میر ضیاءاللہ لانگو پارینے کہ اگہ سویلی پنجاب ءِ انتظامی وڑ اٹ جتا ءُ صوبہ اس جوڑ کننگا تو داڑان مسہ کروڑ آن زیات الس ءِ فائدہ رسینگک۔ د اہیت آتا درشانی ءِ او ان خیالات کا سردارعلی محمد لانگا تون ٹیلفون آ ہیت و گپ کرسا کرے۔ او پارے کہ سویلی پنجاب ءِ گچین وڑ اٹ چلیفنگ و دا علاقہ نامخلوق نا محرومی تے چٹفنگ کن پوسکن ءُ صوبہ اسے نا جوڑ کننگ المی ءِ۔ او پارے کہ سویلی پنجاب ءِ جتا صوبہ اس جوڑ کننگ بھلا سیاسی جماعت آتا منشور اٹ ارے، سویلی پنجاب نا ضلع غاتیٹی رہینگوک آ بندغ آتے تینا کاریم تے کرفنگ کن سَد آ کلو میٹر آتا پند ءِ کرسا لاہور آ ہنوئی تمک، و گیشتری اوفک بے سہب پدی بریرہ۔ ٹیلفون آ ہیت و گپ نا وخت آ صوبائی وزیر داخلہ پارے کہ ای اولیکو دے آن سرائیکی ڈیہہ انا مظلوم مخلوق تون اُٹ۔ او پارے کہ ای ہر وڑ اٹ ہمو سرائیکی ورنا تتون تفوہ، ہرافک تینا جتا صوبہ اس خوارہ۔ انشاءاللہ بھاز زُوت بنجائی حکومت سرائیکی ڈیہہ انا مخلوق کن جتا ءُ صوبہ اسے نا قول ءِ پوروکیک۔ دا وخت آ سردار علی محمد لانگا وزیر داخلہ میر ضیاءاللہ لانگو نا جتا صوبہ کن کمک نا منت ءِ ہرفے و پارے کہ حکومت بایدے جتا صوبہ اس جوڑ کے و نن تون کروک آ قول ءِ پورو کے۔

(خ ن)