میڈیکل کالج آتا داخلہ غان سلوک آتے کن کمیٹی اس ٹہیفنگ نا فیصلہ

کوئٹہ: وزیراعلیٰ بلوچستان میر عبدالقدوس بزنجو نا پارت آ وزیراعلیٰ نا پرنسپل سیکرٹری عمران گچکی نا کماشی ٹی میڈیکل کالج آتیٹی داخلہ غاتا بابت مروک آ جاچ ہلوک دیوان اٹ تعلیمی سال 2021-22 اٹ میڈیکل کالج آتیٹی داخلہ آن زہمی مروک آ طالبعلم آتا میڈیکل کالج آتیٹی داخلہ کن کمیٹی اس تشکیل تننگ نا فیصلہ کرے۔ کمیٹی ٹی وزیراعلیٰ نا کوآرڈینیٹر بابر یوسفزئی، محکمہ جانجوڑی نا نمائندہ و مسکوہی پرنسپل بی ایم سی شبیر لہڑی تون اوار طالبعلم آتا نمائندہ غاک اوار مریرہ۔ کمیٹی داخلہ غاتا آب انا بابت لائخی و میرٹ نا بابت اٹ تینا سفارش آتے مون آ اتسا پیش کیک۔ دیوان آن تران کرسا پرنسپل سیکرٹری پارینے کہ وزیراعلی بلوچستان میر عبدالقدوس بزنجو نا اُست خواہی ءِ کہ میڈیکل کالج آتیٹی داخلہ غاتیان زہمی مروک آ طالبعلم آتا داخلہ غاتا ایسری اس کشنگے۔ او پارینے کہ نن کل طالبعلم آتا ویل آتا ایسری کن تولوک اُن و نن ہچ ءُ حالیت اسے ٹی طالب علم ءِ زہمی تخنگ خواپنہ انتئے کہ دا جاگہ نا طالبعلم آک ننا طالبعلم آک ءُ۔ و نن دا بابت اٹ پاکستان میڈیکل کمیشن و پی ایم ڈی سی اسکان تینا توار ءِ سر کننگک و طالبعلم آتا ویل آتے جوان بنداو آ ایسر کننگک۔ سیکرٹری جانجوڑی صالح محمد ناصر، پرنسپل بولان میڈیکل کالج ظاہر خان مندوخیل و ایلو کمامدار آک ہم او وخت آ ساڑی ئسر۔