۔’’بلوچ تاریخ کی قدیم شخصیت‘‘ نا جاچ اس(3)۔

محبوب شاہ

By Hafeez Baloch Last updated Mar 15, 2022

Get real time updates directly on you device, subscribe now.

ہر محقق تینا قومی و تاریخی علم انا ملاسی ءِ مر کننگ کیک، ہندا قلم نا سنگتی ٹی فاروق بلوچ اینو دہ کتاب نا خواجہ ءِ۔ چار کتاب سنج کروک چھاپہ خانہ ٹی خوندی ءُ۔ فاروق بلوچ قوم انا راست گو ءُ عاشق اسے۔ اونا ہر کتاب بلوچ و بلوچستان نا تاریخ اسے، او نوشت نا سخی و سرخیل اسے۔ قومی تاریخ نوشتوک نا دستار اونا کاٹم آ ٹہیک۔ ’’بلوچ تاریخ کی قدیم شخصیات‘‘ کتاب نا بشخ دو بننگ آن راستی اٹ تاریخ و تحقیق نا خواست آتے پورو کیک۔ فاروق اٹ پٹ و پول نا جادوگری ارے۔ اونا ہر کتاب اٹ گوہنگوک آ تاریخ نا اسہ بھلو بشخ اس اوار ءِ۔ او تاریخ نا اسہ اسہ پنہ ءِ قلعہ غاتا جیل خانہ غاتیان وطن نا سیم و دنگ آن مش تا ٹول آن سنگر آتا چَپ آن چکسا کشنگ ءِ۔ پیرہ غاتا غیرت نا مٹ ءِ پاک انگا کڑد ءِ کھڈ و کوڈ آتا تل آن ٹھپی ٹوری آ است آتیان ہوغسا کشانے۔ خواری ٹی خواری کش آتا چوٹ آک پچ آک کشکر ولے تاریخ نا مڈی نا رند اٹ تاریخ دان تینا ملی ءِ زند انا چس ءِ خاخر نا زراب آ پوغ کیک۔ گڑا دمب آتیان کھڈ اسے آن است اسے آن تاریخ نا مڈی دو بریک۔ داڑکن بلوچ تاریخ نا خواری کش فاروق بلوچ ننا مون آٹے، تحقیق و تنقید نا ملاس آتیان خواست ءِ کہ اوفک دا متکن آ پوسکن دو بروک آ مڈی ءِ تینا لیب انا چشمک آن کشر، اومیت ءِ اوفتے پٹ و پول نا پڑ آ ضرور علمی ءُ کٹیا اس دو برو ءِ۔

دا کاریم ءِ اسہ ترند ءُ عاشق اس کننگ کیک، ہراسٹ نا است اٹ ہانی وطن نا مہر مرے، ڈاکٹر فاروق بلوچ آن اسٹ اس سوج کرے ’’یار گنوک کرینس تینے، زند ءِ زیان کننگ اُس۔ نی اُس کتاب آک ءُ، قلم ءِ کاغد ءِ۔‘‘

فاروق بلوچ پارے ’’او کنا خواجہ! نے انت سما ءِ، قوم و وطن نا مہر انت ءِ پارہ؟ کنے قوم و وطن تون عشق ءِ۔ کنے اوفتیان مہر انا اومیت ارے۔ ہرا کہ بدر ءُ قوم و وطن اسے آن مننگ کپک۔ ہرا کہ کنا زند انا تنیائی ٹی بھلو وخت کن تون سنگت مسنو۔ اوفک کنا جوزہ ءِ مدام سلامت تخانو۔ کنا خیال سوچ و فکر انا دمدری ءِ مر کرینو۔ ہمو قوم و وطن آتے ہرا کہ منہ وخت کنا مہر انا کنا عشق انا گپ آتے خف تورینو، او ہندا گپ آتے بلوچ تاریخ نا رنگ اٹ بدل کرینو۔

تینا زیبا غا وطن نا پاناد نا کچ اکن تینا بولی نا ہنین آ چکل آتا رند اٹ ہزار میل انا سفر آن پد کنا زیبا تینا زیبا غا دروشم اٹ کنا مون آ بسنے۔ کنا است انا درگہ اونا بننگ نا توار ءِ بنگنے، او کنا دوٹی تینا مہر انا پلو ءِ تسنے، داخس لاڈی ءُ سنگت ای خواو ہم تینا قوم و وطن نا عشق آن تینے کشنگ کپرہ۔‘‘

کنا دعا ءِ کہ ڈاکٹر فاروق بلوچ نا عشق مدام برجا سلے۔ اونا قلم پوٹا و مہلب نا زباد اسے، نرگس و گواڑخ نا بھرم ہرفے۔

اسہ تاریخ نا نوشتوک بھلو ہستی اسے نا پنی ءُ کتاب اسے نا تحقیق نا جاچ ءِ ہلنگ کتاب نوشتہ کننگ آن ود مشکل ءُ کاریم اسے۔ دا کاریم نا بڈ ءِ زیات ترند انگا فلسفی پنی آ تاریخ دان شاعر و ادیب آک ہرفرہ، ہرا کہ تاریخ اٹ فلسفہ، ادب و شاعری ٹی تینا زند انا ورنائی و زیبائی نا بے مٹ آ وخت ءِ گدریفینو۔ راج اٹ ہستین بیگواہی ٹھپی ٹوری آ جون تے تینا خن تیٹی خنانو۔ پیر مڑد ولمہ غاتا خڑینک آتے تینا بارن آ دُو اٹ سفا کرینو۔ ورنا مسن تا کاٹم آ دو تے تخانو، ہرا کہ تینا دشتار نا کسر آ بین ہڑتال نا کونٹ آ تولوک مسنو۔ ڈکھ ویل بین ملاسی تون ظلم جبر انا دیر و خاخر آن گدرینگانو۔ دا کشیدہ ءِ ہمو بندغ آک گنڈنگ کیرہ، ہرافتا نوشت آتا گچین آ رشنائی کور تے خنی کیک۔ کر آتے خفی۔ ہندا بندغ آک اسہ کتاب اسے نا جاچ ءِ ہلنگ کیرہ۔ کتاب نا اہمیت و حیثیت ءِ ہرکس نا مون آ تالان کننگ کیرہ۔ دا باریم کن ہندا ٹوخر آتا کوپہ جوڑ ءِ۔ نزور آ کوپہ تینے پرغک یا باریم ءِ۔

’’بلوچ قدیم شخصیات‘‘ آ کن کون آ بوگ شوگ نوشتہ کروک آ نزور آ بندغ کن کتاب نا جاچ ءِ ہلنگ ہندن ءِ دن کہ پارہ اسہ جاگہ اس ہُلی ءِ نال کریرہ، تو پغٹ ہم نت ءِ تینا کشا پارے داڑا ہم خلبو۔ انتئے کہ براہوئی ادب اٹ ای نوشت نا پڑ آ لونڈائنگ انگ اُٹ، ای تینا بستہ ءِ ہرفنگ کپرہ۔ فاروق بلوچ کون آ تاریخ نا پہلوان نا بڈ ءِ امر ہرفوٹ؟ دا ای تینا نزوری ءِ سیال آتا مون آ امر پاش کیو؟ چکل آتا با ءِ امر تورو؟ پال/ و شراب نا مڈی ءِ امر خوا ٹی شاغو؟ ہرا کہ ننے لولی ایتسہ نن و دے وہیرہ۔ نن ملاس اُن، سیال آک آبِ کوثر نا چَس ہلنگ ءُ۔

ہفتئی تلار

تاک:46

10-04 دسمبر 2021ء

پنہ: 05