نوجوانی نا مفک

ہوش کرک اے نوجوان نوجوانی نا مفک

ہوغفک دے اس جہان نوجوانی نا مفک

دا زمانہ دِرک تیسہ نا دتر تازہ ارے

منڈ مریسہ نت تیان نوجوانی نا مفک

تیار مر اے دے اکن نی دوٹی نا چوچہ اس الو

نی سلوسک خن تیان نوجوانی نا مفک

شئیر پاسہ کل آن جوان ءُ بھاز ہنین ءِ نا توار

دے اس لڑزو نا زبان نوجوانی نا مفک

زیبا غا بالاد نا ہر گودی ءِ دوست ارے

کب مریسہ نی مخ آن نوجوانی نا مفک

ناز کیسہ لاتما اُس نی تینا دا مار تیا

تولپرو کس نا رہ آن نوجوانی نا مفک

کوک کروسک مار مسڑ ءِ دیر زرس ایتبو کنے

موڷ کرو نا استخان نوجوانی نا مفک

خنپیسہ پیر انگو ہچ کس شار اٹی چرینگسہ

خیرات خوارہ پین تیان نوجوانی نا مفک

ہڈ آک نا بور بور مرور درد کرو ءِ نا بدن

تموسک دوست نی تغ آن نوجوانی نا مفک

کپہ داخہ قتل دزی اللہ ءِ راضی کرک

قبر انا بچہ نی پو تیان نوجوانی نا مفک

کوک کروس منت کروس بے وسی اٹ ہر کس ءِ

لٹ تمو ءِ نا دو آن نوجوانی نا مفک

شان ہنو شوکت نا گپ نا محتاج مروس

کوک بریک ہر وخت قبر آن نوجوانی نا مفک

بے حیائی تے خنوسک خلق انا نی خن تیٹ

بچف تینے دوزخ آن نوجوانی نا مفک

بند گی ءِ رب انا کر کل اتون کر دولخی

کٹہ حور اس جنت آن نوجوانی نا مفک

کوک پوہاڑ نا مرو عقل ہوش آن نی ہنوس

نے ملپرور زمزیر تیان نوجوانی نا مفک

بھلو بھلو ہیت کیسہ خلق انا بھلن اریس

کر ہمون انت پاہے قران نوجوانی نا مفک

انت کمی ئس خنجری نا رنگ دا بالاد اٹی

نی مفہ غاوی تینا تیان نوجوانی نا مفک

ہفتئی تلار

تاک: 30

01-08 August 2020

پنہ : 06