الس نا خذمت کننگ ءِ اولیت ایتنہ‘ چیف سیکرٹری بلوچستان

کوئٹہ: الس نا خذمت کننگ ءِ اولیت ایتنہ‘ ہراڑکن مدام کوشست کینہ و صوبائی حکومت الس نا آسودہی کن کیہی ڈٹ آتیا کاریم کننگ اٹی ءِ‘ افسر آک الس نا ویل آتے ایسر کننگ کن دے ونن کاریم کیر۔ دا خیال آتا درشانی ءِ چیف سیکرٹری بلوچستان عبدالعزیز عقیلی سیکرٹریز کمیٹی نا دیوان ناکماسی ءِ کننگ ناوخت آ کرے‘ دیوان اٹ سنیئر ممبر بورڈ آف ریونیو روشن علی شیخ، سیکرٹری لاء عبدالصبور کاکڑ، سیکرٹری پراسیکیوشن غلام علی بلوچ، چیئرمین سی ایم آئی ٹی عبدالرحمن بزدار تون اوار کل سیکرٹری وخت اس کہ ڈویژنل کمشنر و ڈپٹی کمشنر آک ویڈیو لنک آ بشخ ہلکر‘ دیوان اٹ شونداری ڈٹ آتا پروجیکشن، پی ایس ڈی پی آٹومیشن، ریسٹ ہاؤس آتا آؤٹ سورسنگ، ہسپتال آتے ٹی دارو تا فراوانی‘ خورک انگا اسامی تے میرٹ آ پُر کننگ‘ پرفارمینس ایویلوایشن رپورٹ نا آٹو میشن، یوٹیلیٹی بل آتے تننگ تون اوار ایلو امور تا جاچ ءِ ہلنگا۔ سیکرٹری جانجوڑی صالح ناصر دیوان ءِ محکمانہ امور تیا بریفنگ ترسا پارے کہ ہسپتال آتے ٹی فرض آتے ٹی ڈیوالئی کروک 6 ڈاکٹر ءِ ملازمت آن کشنگانے و 57 ڈاکٹر نا برخلاف انضباطی کاروائی نا بناءِ کننگانے وخت اس کہ سرکاری ڈیوٹی نا جاگہ غا نجی پریکٹس کروک 40 ڈاکٹر ءِ شو کاز نوٹس جاری کننگانے‘ او پوسٹ گریجویٹ ڈاکٹر تابابت پالیسی نا مسودہ ءِ پیش کرے ہرانا رد اٹ پوسٹ گریجویٹ ڈاکٹر آتیکن تینا علاقہ غاتے ٹی کم آن کم مسہ سال تعیناتی المی مریک۔ چیف سیکرٹری پارے کہ جانجوڑی نا باندات آتیا ہچ سمجھوتہ کننگپک و فرض آتے پورو کپروک ڈاکٹر آتا برخلاف کارروائی تے برجا تخنگ ناپرمان کرے۔ او پارے کہ سرکاری ہسپتال آتے ٹی پیتھالوجی لیبارٹری تے آؤٹ سورس کننگ و نجی بشخ و پنی آ تنظیم تا اواری اٹ اسیجائی ڈٹ آتے ٹی کاریم کننگ نافیصلہ کرینے۔ نجی بشخ ءِِ واکدار کننگ نا گرج ءِ تاکہ دا زیات جوان مرے و جوان خذمت کننگ کے۔