آئی ایم ایف نا کنڈ آن سود کچ اٹ دمدستی ودکی نا خواست

اسلام آباد : آئی ایم ایف سود کچ ءِ دمدستی ودفنگ نا خواست کرینے وخت اس کہ غریبی آن خوار الس ءِ پین خوار کننگ کن اسہ سَد و 70ارب روپئی نا پوسکن ءُ خراج خلنگ نا تیاری ہم گڈیکو ریسہ ٹی ءِ۔ حوالی نا رد اٹ پاکستان و آئی ایم ایف نا نیام اٹ میمورنڈم آف اکنامک فریم ورک آ ورچول دیوان اڈہلک‘ دیوان اٹ وزارت خزانہ نا کمامدار آک میمورینڈم آف اکنامک فریم ورک نا کل پہلو تا جاچ ءِ پیش کریر۔ اسٹاف لیول معاہدہ غان مست آئی ایم ایف نا پیشگی شڑت آتیا عملدرآمد نا جاچ ءِ ہم ہلنگا۔ ورچول مذاکرات اٹ 170 ارب روپئی نا پوسکن آ خراج نا بابت امور تیا ہم گپ وتران کننگا۔ آئی ایم ایف اسہ وار ولدا فلڈ لیوی خلنگ نا مخالفت ءِ کرسا فلڈ لیوی خلنگ نا ارادہ ءِ الا ولے آئی ایم ایف آخبتی خراج خلنگ نا خواست کرینے‘ حوالی نا رد اٹ بجلی و گیس انا نہاد آتے ودفنگ نا بابت آئی ایم ایف ءِ آگاہ کننگا و حکومت ناکنڈآن گیس بجلی نا نہاد ءِ ودفنگ نا نوٹیفیکیشن تے پیش کننگا وخت اس کہ پڑک آتا نیام اٹ میمورنڈم آف اکنامک فریم ورک آ ورچول مذاکرات اینو ہم برجا سلک‘ حوالی نارد اٹ آئی ایم ایف سود کچ اٹ دمدستی ودکی نا خواست کرینے وخت اس کہ پوسکن ءُ خراج خلنگ نابارو اٹ پالیسی ہم پک کننگانے۔ وزات خزانہ نا حوالی پارینے کہ خراج نا سود ءِ ریسہ اٹ ودفنپک۔ سیلز ٹیکس انا 18 غان 21 درسَد کچ انا اطلاق کم آن کم بشخ آتیا کننگک‘ خراج نا کچ ءِ کرار کرار آ ودفنگک۔ 170روپئی نا پوسکن آ خراج خلنگ نا تیاریک ہم گڈیکو ریسہ ٹی ءِ۔ ملکی اکنامک گروتھ ءِ زہمی مننگ آن بچفنگک۔ 2درسَد گروتھ نا بنداو آ اسیجا خراج ودفنگ آن زرگزران نا نسخانی نا گڑتی ارے‘ حوالی نا رد اٹ ایف بی آر نا ٹارگٹ 5 درسَد آن زیات ودفنگ مفک‘ بجٹ نسخان ہم بیرہ پنچ درسَد کم کننگ مریک‘ وام تے پدی تننگ نا شیڈول اٹ رعایت دوئی کننگ نا موکل مریک وخت اس کہ اسٹاف لیول معاہدہ نا ہندا ہفتہ ٹی گمان ارے۔ داکان بیدس بنجائی حکومت آئی ایم ایف نا اسہ پین شڑت اس پورو کرسا بجلی صارف آتیان فیول چارجز ہلنگ نافیصلہ کرینے‘ حوالی نا رد اٹ بنجائی کابینہ بجلی نا صارف آتیان فیول چارجز ہلنگ نا منظوری ءِ تسنے ہرانا رد اٹ 55ارب روپئی ریکور کننگک۔ جون، جولائی2022 نا توئی فیول ایڈجسٹمنٹس نا ریکوری کننگک۔ بنجائی کابینہ غان سرکولیشن نا کمک اٹ سمری نا منظوری ہلنگا۔ حوالی نا رد اٹ بجلی نا صارف آتیان قسط اناوڑ اٹ فیول چارج ہلنگک۔ جون2022 نا فیول ایڈجسٹمنٹ نا 9.90 روپئی فی یونٹ ہلنگک۔ جولائی2022 نا فیول ایڈجسٹمنٹ نا 4.34 روپئی فی یونٹ ہم ہلنگک۔

(آن لائن)