مارچ اٹ درآمدی خولم نا 9 بحری جہاز گوادر بندرگاہ غا سرمریرہ

گواد: مارچ انا اولیکوہفتہ ٹی 450000 میٹرک ٹن درآمدی خولم نا 9 بحری جہاز گوادر بندرگاہ غا سرمریرہ‘ ہراڑان گوادر بندرگاہ غا بروک آ تُو انا بنا ٹی بھلو کچ اسے ٹی واپاری سرجز آک بنا کیرہ۔ گوادر بندرگاہ غا داخس بھلوکچ اسے ٹی خولم درآمد کن آپریشنل تیاریک گڈیکو ریسہ ٹی ءُ ہراڑکن کل اسٹیک ہولڈر تتون اوار ٹی سی پی، پاسکو، ایل این سی، نیوی تھرڈ ایف پی، سکیورٹی ادارہ، ڈپٹی کمشنر گوادر، گوادر کسٹمز، گوادر پورٹ اتھارٹی و گوادر انٹرنیشنل ٹرمینل لمیٹڈ کاریم کننگ ءُ۔ سیکرٹری نیشنل فوڈ سکیورٹی ظفر حسن گوادر پورٹ آپریٹر و گوادر انٹرنیشنل ٹرمینل لمیٹڈ تون اہم رابطہ کرینے ہراٹی گوادر بندر گاہ غا خولم نا درآمد نا رد اٹ سرجم آپریشنل انتظام آ گپ وتران کننگا‘ دیوان اٹ چیئرمین چائنا اوورسیز پورٹس ہولڈنگ کمپنی یو بو، چیف آپریٹنگ آفیسر گوادر انٹر نیشنل ٹرمینل لمیٹڈ ہاؤ جیان، جنرل منیجر آپریشنز ٹریڈنگ کارپوریشن آف پاکستان شیراز علی، مینیجنگ ڈائریکٹر پاسکو کیپٹن (ر) سعید احمد وایلوفک اوار ئسر۔ چیئرمین گوادر انٹر نیشنل ٹرمینل لمیٹڈ شریدار آتے پارے کہ گوادر بندرگاہ غا گدرینگوک آ تُو یوریا نا درآمد و اوفتے سر کننگ نا مشق کننگانے ہراٹی ہچ ءُ کمتی اس خننگتو۔ او پارے کہ بروک آ جہاز آتا سلفنگ ءِ پک کننگک و ہڑدے نا بنداو آ خولم نا آپریشن کن 200 گاڈی نا کمک اٹ کاریم مننگ کیک۔ سیکرٹری نیشنل فوڈ سکیورٹی گوادر بندرہ ءِ دا وڑ انا پین کاروبار تننگ نا پارسا پارے کہ ہر وڑ انا آسراتی تیان شپ دا بندرگاہ گڑاتا سر کننگ اٹ کمک ایتک وخت اس کہ گوادر بندرہ گاہ غان 4,50,000 میٹرک ٹن خولم درآمد کننگ کن ٹریڈنگ کارپوریشن آف پاکستان و گوادر انٹرنیشنل ٹرمینل لمیٹڈ نا نیام اٹ تدوک آ سال باضابطہ معاہدہ مسوسس‘ دا معاہدہ ڈیہہ اٹ اسہ لاجسٹک حب انا وڑ اٹ گوادر بندرگاہ نا فطری لائخی تے گچین کننگ ناکنڈآ بھاز بھلو پیش رفت اسے‘ ہراکہ اخیر اٹ پاکستان نا زرگزران اٹ جی ڈی پی ٹی 10 ارب امریکی ڈالر بشخ ایتک۔

(خ ن)