وزیراعظم عمران خان مخلوق نا تینا اُراتا تغ ئِ تعبیر تننگ ئِ، فردوس اعوان

اسلام آباد(اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ وزیراعظم عمران خان مخلوق نا تینا اُرا نا تغ ئِ تعبیر تننگ ئِ، 20ہزار اُراتا 7 ڈٹ آتابنا50لکھ اُراتا تفنگ ناتغ ئِ پوروی نا کنڈآ عملی گام اسے ، کم کٹیا کروک پاکستانی تا زند انا آب ئِ بڑز کننگ وزیراعظم عمران خان نا مشن ئِ ، پاکستانی تیکن چھت انا فراوانی ننا منشور اٹی کروک آوعدہ ئِ۔ ڈاکٹر فردوس عاشق اعوان پنچ شنبے نادے آ تینا ٹویٹ اٹی پارے کہ انشاءاللہ الس نا است انا خواہش آک پورو مریرہ، اوفتے اوفتا اُرانا مالک کینہ، دا گام آن تعمیرات نا بشخ شون ہلیک، دا اسہ بشخ آن 40 صنعت چلینگرہ ہراڑآن روزگار نا وارخواہی ودی مریک و زرگزرانی سرجزآک ترند مریرہ۔ اوپارے کہ وزیراعظم عمران خان قوم انا احساس تخوک آ اسٹ انگا لیڈر راہشون ئِ ہرابیدس چھت آن خاچوک آتے لڑزفوک آ یخ و باسنی آن بچفنگ کن جاگہ غاتا بست و بند ئِ کرینے۔