ترک زرگزران ءِ زمی جمب آن نسخان نا کساس 84 ارب ڈالر

انقرہ : ترک زرگزران ءِ زمی جمب آن ملوک آ نسخان نا کساس ءِ 84 ارب ڈالر خلنگانے۔ امریکی مالیاتی کمپنی بلومبرگ ترک بزنس گروپ ”ترک آن فیڈ“ نا رپورٹ نابابت پارینے کہ دا زر ترکی نا جے ڈی پی نا دہ می بشخ ءِ۔ ادارہ نا رداٹ دافتیان 70.1 ارب ڈالر نا نسخان ماڑی تا تمنگ نا سوب آن مسنے وخت اس کہ زمی جمب اٹی کٹیا ٹی گمانی کمتی نا کساس 10.4 ارب ڈالر ءِ۔ ادارہ نا رداٹ داکان بیدس سڑک، بجلی و گیس انا تنصیب، تیل انا پیپ لائن، کمیونیکیشن نا نظام و ہسپتال و اسکول زمی جمب آن بھاز زہمی مسنو۔ ترکیہ ٹی 6 فروری آ بروک آ ترند انگا زمی جمب و اوکان پد آفٹرشاک آتیان 9 صوبہ بھاز زہمی مسنو۔ دا 1939 آن پد ترکیہ ٹی بروک آ ترند انگا زمی جمب ئس۔ داکان مست امریکی ادارہ فچ پاریسس کہ ترکی ٹی زمی جمب آن مالی نسخان تا کچ 4 ارب ڈالر اسکان سرمننگ کیک وخت اس کہ بینک آف امریکہ دا کساس ءِ 3 آن 3 ارب ڈالر خلسا پاریسس کہ زہمی علاقہ غاتیٹی بحالی و پوسکن تفنگ کن پین اِرٹ آن مسہ ارب ڈالر درکار مریک۔

(اے پی پی)