برادر ملک آتا اُلس نا بحالی کن کاریم کروئی تمک‘ ڈی سی زیارت

زیارت : ڈپٹی کمشنر زیارت شبیر احمد بادینی نا خاص ءُ پارت اسے آ زیارت نا جامع مسیت و زیارت اٹ ترکی و شام انا زمی جمب انا زہمی تیکن چندہ مہم ءِ بنا کرینے۔ دا بابت اٹ مسیت آتیٹی بینر ہم خلکوسر۔ اینو جامع مسیت زیارت نا خطیب مولوی اللہ داد اُلس نا کنڈآن خیرات مچ کریر۔ ڈپٹی کمشنر زیارت تون شبیر احمد بادینی او وخت آ پارے کہ شام و ترکیہ ٹی زمی جمب بھلو بھسکاری کرینے۔ ہزار آ اُرا تے بھس کرے۔ اُلس نا حد آن زیات جانی ومالی نسخان مس۔ قدرتی آفت آتا نسخان نا پوروی ءِ آسان اف۔ نن تینا برادر ملک آتا اُلس نا بحالی ٹی تینا بشخ ءِ شاغنگ کن ریلیف نا کاریم ءِ بنا کرے دا بابت اٹ ڈپٹی کمشنر زیارت آفس اٹ کمکی کیمپ اس جوڑ کرینے۔

(خ ن)