دریائے سندھ اٹی دیر نا کاختی نا زہم مچ آ نظام آ مسنے، دیر نا منصفانہ بشخ و بانٹ ءِ پک کننگک، قربان علی جتوئی

صیر آباد: چیف انجینئر کینالز قربان علی جتوئی، ایگزیکٹو انجینئر پٹ فیڈر کینال فرید احمد پندرانی و سب ڈویژنل آفیسر امان اللہ گاجانی تون اوار ڈپٹی کمشنر جعفرآباد خالد خان آن خریف سیزن نا وخت آ کشاری دیر نا بابت تفصیلی گپ و تران کرے۔ دا اوڑدہی ٹی سب ڈویژنل آفیسر سید امجد شاہ ہم ساڑی ئس۔ ملاقات نا وخت آ ڈپٹی کمشنر خالد خان ضلع جعفرآباد اٹی کشاری گرنچ آ سُج پام نا رِد اٹ الس ءِ اوفتا بشخ نا دیر فراوان کننگ نا بابت آگاہی تس۔ دا موقع آ ایگزیکٹو انجینئر پٹ فیڈر کینال فرید احمد پندرانی پارے کہ سندھ آن دیر نا فراوانی اٹی شارٹ فال (کاختی) نا سوب آن خواری تا مون تننگ مروئی بریک۔ چیف انجینئر کینالز قربان علی جتوئی پارے کہ دریائے سندھ اٹی دیر نا کمتی نا زہم مچ آ نظام آ مرتب مسونے، ولے محکمہ نا کنڈ آن دستیاب دیر نا منصفانہ بشخ و بانٹ ءِ پک کننگ انگ اٹی اے۔ او پارے کہ دیر نا دُزی نا برخلاف بے فرق آ کارروائی غاک برجا ءُ، اوور سائز پائپ آتا کمک اٹ ٹیل نا کشارگر آتا حق ءِ پلوک آتا برخلاف سخت ءُ ایکشن ہلنگ انگ اٹی اے و داسکان 8 دیر دُز آتا برخلاف کانودی کارروائی کننگانے۔ او مستی پارے کہ ضلع جعفرآباد نا مچ آ کینال آک ٹیل آ مننگ نا سوب آن دیر نا ترسیل اٹی خواری و اڑاند آک پیش بریک، ولے محکمہ ایریگیشن الس و کشارگر آتے اوفتا بشخ نا دیر سر کننگ کن غٹ دستیاب آ وسیلہ غاتے کاریم اٹ اتنگ اٹی اے و دیر نا منصفانہ فراوانی ءِ ہر حال اٹی پک کننگ مرو۔