زمیندار تے بجٹ اٹ ریلیف فراوانی نا نا ستا ءِ کینہ، خالد حسین

کوئٹہ: چیئرمین کسان اتحاد پاکستان خالد حسین بنجائی بجٹ 2023-24اٹی زمیندار آتے ریلیف فراوان کننگ نا خیرمقدم ءِ کرسا وزیراعظم نا منت واری ءِ ہرفے۔ اودوشنبے نادے آ کوئٹہ پریس کلب اٹی نیوز کانفرنس آن تران کرسا پارے کہ بجٹ اٹی بزغرآتیکن ہرا پیکج ءِتخنگانے اوڑان زمیندار آتا مشکل آتیٹی کمتی بریک۔ داوخت آ صوبائی صدر ملک عصمت اللہ دمڑ، کسان اتحاد نا جنرل سیکرٹری عطاء اللہ لانگو و ایلوفک ہم ساڑی ئسر۔ چیئرمین کسان اتحاد پارے کہ بجٹ اٹ 50 ہزار کسان کشاری ٹیوب ویل سولر آتیا گدریفنگرہ ہراڑان کشت وکشار نا بشخ اٹی انقلابی بدلی اس بریک۔ اوحکومت آن خواست کرسا پارے کہ بجٹ اٹ بزغرآتے آسان وام اسکیم ایتے تانکہ کسان حکومت آن وام ہلسا ٹیوب ویل ہم ہلنگ کیر۔ داوخت آ صوبائی صر ملک عصمت اللہ حکومت آن لوڈشیڈنگ نا وخت ءُ پاس ءِ کم کننگ نا خواست کرسا پارے کہ کچلاک اٹی 24 گھنٹہ آن 5 گھنٹہ بجلی فراوان کننگ آن باغ تے نسخان ملنگ ءِ ہندا سوب آن بجلی نا لوڈشیڈنگ اٹی کمتی کننگے۔ ایسر اٹ کسان اتحاد پاکستان نا چیئرمین خالد حسین و ایلو راہشونک بنجائی حکومت نا کنڈآن سولرز، بیٹریز و ایلو گڑاتیا ڈیوٹی ءِ چٹفنگ آ حکومت نا ستاءِ کرا وزیراعظم محمد شہباز شریف و کابینہ نا منت واری ءِ ہرفیر۔

(اے پی پی)