ضلع کونسل کیچ نا گچین کاری تیٹی غیر سیاسی تے توننگ المی ءِ، مالک بلوچ

تربت: نیشنل پارٹی نا کماش بلوچستان نا رداٹ وزیراعلی ڈاکٹر عبدالمالک بلوچ پارینے کہ ضلع کونسل کیچ نا مجوزہ الیکشن ٹی غیر سیاسی گڑاتا کسر ءِ توننگ دا جاگہ نا سیاسی و جمہوری طاقت آتا قومی زمواری جوڑ مسنے۔ نیشنل پارٹی و ننا اتحادی کیچ اٹ ایلو سیاسی جمہوری طاقت آتا شریکی نا خواہندار اُن۔ تانکہ سیاسی طاقت آتے اسٹ کرسا غیر سیاسی آ بندغ آتا مون آ جمہوری مزاحمت نا علم ءِ جوان وڑاٹ بڑز کننگے۔ دا خیال آتا درشانی ءِ او تدوک آ دے تینا اُرا ٹی پارٹی تون گنڈوک یونین کونسل آتا چیرمین و سینئر سنگت آتون اڈ ہلوک دیوان نا کماشی ءِ کرسا ڈاکٹر عبدالمالک بلوچ دیوان آن تران کرسا پارینے کہ مکران بلوچستان نا شون ہلوک آ سیاسی کاریم تا روشنا ءُ چہرہ اسے۔ ہرا ننکن اعزاز و شرف آن کم اف۔ دا جاگہ نا کل سیاسی و جمہوری طاقت بلوچستان نا دا روشن آ چہرہ ءِ داغدار مننگ نا کاریم نا مون آ جمہوری مزاحمت نا علم بڑز کیک۔ ڈاکٹر عبدالمالک بلوچ دیوان ءِ بریفنگ ترسا پارینے کہ دا بابت اٹ بلوچستان نیشنل پارٹی مینگل نا کماش آتون اوفتتون ہیت وگپ مسنے۔

(آن لائن)