بلوچستان نا الس ورگڑیفنگ اٹ بفننگ ءِ، شونداری ٹی کڑد ادا کننگ ءِ، جام کمال

کوئٹہ(آن لائن) وزیر اعلیٰ بلوچستان میر جام کمال خان پارینے کہ بلوچستان نا غیرتی آ الس داسہ کس انا ورگڑیفنگ اٹ بفننگ ءِ، و اوتینا ڈیہہ انا شونداری ٹی کڑد ادا کننگ اٹی ءِ۔ داسہ اے وخت ہنانے کہ بلوچستان نا مخلوق ءِ منہ پیسہ ترسا ریفنگ آسان ئسکہ۔ صوبہ ٹی شونداری و شونہالی نا اسہ پوسکن ءُ دور اس بنا کرینے، ہراڑے تعلیمی پڑ آ گچینی ننگ اٹی ءِ، جانجوڑی آسراتیک ہم ودنگ اٹی ءُ۔ کورونا وائرس نا مون ءِ توننگ کن صوبائی حکومت غٹ وسیلہ غاتے کاریم اٹ اتنگ اٹی ءِ۔ بنجائی حکومت و این ڈی ایم اے نا کنڈ آن ہر وڑ اٹ کمک فراوان کننگ انگ ئ،۔ ولے داسہ دا صوبہ غاتا زمواری ءِ کہ اوفک دا وسیلہ غاتے ہرا کچ اسکان کاریم اٹ اتسا وائرس نا برخلاف جنگ ایتک۔ بلوچستان اٹی کورونا وائرس نا 80 آن 85 درسَد کیس آک کوئٹہ ٹی رپورٹ مسنو، ایلو 15 غان 20 درسَد کیس آک مچ آ بلوچستان اٹی مون آ بسنو۔ داسہ ہم ہندن ءُ کیہی ضلع اریر، ہراڑے داسکان اسہ کیس اس ہم رپورٹ متنے۔ جانجوڑی ایمرجنسی نا رد اٹ صوبہ ٹی 4ہزار بندغ ءِ آئسولیٹ کننگ نا لائخی ارے۔