پی ٹی آئی نا جنرل سیکرٹری کراچی ارسلان تاج دزگیر

کراچی : کراچی ٹی پاکستان تحریک انصاف (پی ٹی آئی) نا راہشون ارسلان تاج ءِ دزگیر کننگا‘ پی ٹی آئی نا ترجمان نا رد اٹ ارسلان تاج ءِ اونا ہنکین گلشن اقبال آن دزگیر کننگانے۔ ترجمان پارینے کہ ارسلان تاج ءِ سادہ لویس بینوک کارندہ غاک دزگیر کریر‘ایلو کنڈآ کراچی ٹی پولیس ناکنڈآن سہب انا نماز نا وخت آ سندھ اسمبلی نا باسک راجا اظہر و خرم شیرزمان نا اُراغا چھاپہ خلنگا۔ ترجمان پی ٹی آئی پارے کہ پولیس نا کنڈآن راجا اظہر نا خاہوت ءِ ریزاریفنگا۔ چھاپہ ناوخت آ ایم پی اے راجا اظہر و خرم شیر زمان اُراٹی ساڑی الوس۔ ترجمان پی ٹی آئی پارے کہ پولیس ناکنڈآن غیرکانودی کارروائی تا مذمت ءِ کینہ‘ اینو اسہ وار ولدا پولیس چادر و چار دیوالی نا تقدس ءِ لتاڑا‘ اوپارے کہ وزیراعلیٰ و آئی جی سندھ آن خواست کینہ کہ ارسلان تاج ءِ دمدستی یلہ کننگے۔ پارٹی سرکڑدہ غاتتو سلابت آن پد لائحہ عمل نا پڑو کینہ۔

(آن لائن)