دشمن کُشت و خون، بے ایمنی کرسا ڈوہ تا دوبہ ءِ ریاست و ریاستی ادارہ غاتیا خلنگ ءِ،وزیراعلیٰ بلوچستان میر سرفراز بگٹی

وزیراعلیٰ بلوچستان میر سرفراز بگٹی پارینے کہ دشمن اسہ کنڈ آکشت وخون، بے ایمنی و کودک آ شاری تا خون ءِ کننگ ءِ تو ایلو کنڈ آہمو ڈوہ تا دوبہ ءِ ریاست و ریاستی ادارہ غاتیا خلنگ نا گمرا کروک پروپیگنڈا ٹی ہم اختہ ءِ۔ بلوچستان نا وطن دوست الس ءِ دشمن نا دا ناپاک بیانیہ نا بشخ مننگ نا جاگہ غا قومی یکجہتی، امن و سوگوی کن ریاستی ادارہ غاتتون ہم کوپہ سلوئی مریک۔ او دا ہیت ءِ بی اے مال انا خڑک آ برجا دھرنا نا بشخ ہلوک و شہید آتا خاہوت آتتون اوڑدہی و ہیت و گپ نا وخت آ کرے۔ دا وخت آ صوبائی وزیر جان جوڑی بخت محمد کاکڑ، سینیٹر منظور احمد کاکڑ، کمشنر کوئٹہ ڈویژن شاہ زیب کاکڑ و ایلو بڑزکو کمامدارآک ہم ساڑی ئسر۔ وزیراعلیٰ پارے کہ او اولیکو دے آن دھرنا کمیٹی تون پدریسہ رابطہ ٹی ئس و ویل انا پرامن، باوقار و آخبتی ایسری کن وس انا کچ آ کوشست کرسا کرے۔ او پارے کہ زہمی خاہوت و اوفتا کماش آتتون اونا تین پہ تینی عزت و شرف نا بنداو آ متکن تعلقداری ارے ہرا آخبت ٹی ہم برجا سلک۔ او پارے کہ او مدام تینا الس نا تون ہم کوپہ سلیسنے و آخبت ٹی ہم الس نا خذمت و اوفتا ویل آتا ایسری کن وس انا کچ آ کڑد ادا کیک۔ میر سرفراز بگٹی پارے کہ دہشت گرد آک کودک وو بے گناہ شاری تے بے دردی اٹ شہید کیرہ، خاہوت آتے بھس و کودک چناتے چوری کیرہ، وخت اس کہ اوڑتون اوار ریاستی ادارہ غاتا برخلاف دروغ و غَرہ کروک پروپیگنڈا کرسا الس و ریاست نا نیام اٹ بے پتی ودی کننگ نا کوشست کیرہ۔ او پارے کہ ہندا ریاستی ادارہ غاک الس نا جان و مال انا رکھ اکن ہڑدے تینا جان تے تننگ ءُ۔ او پارے کہ ہنداوخت آ پاکستان نا بہادر ورنا وطن نا رکھ اٹ بھلو قربانی تننگ ءُ۔ لسبیلہ ٹی شہید مروک آ پاک فوج انا ورناک ہم کس اسے نا مار، کس اسے انا اَرے و کس انا خاہوت نا اومیت ئسر، ہرافک بلوچستان و پاکستان نا امن، الس نا رکھ و بروک آ چین تا رکھوک آخبت کن تینا جان تے ندرکریر۔ وزیراعلیٰ پارے کہ پاکستان نا برخلاف جہانی کہول آ گڑاس سازش مننگ ءِ۔ اسہ سازش دہشت گردی، بیداد و کشت وخون نا کمک اٹ ملک ءِ نزور کننگ ءِ وخت اس کہ ایلو سازش ہندا ڈوہ تا دوبہ ءِ ریاستی ادارہ غاتیا خلسا الس ءِ گمرا کننگ ءِ۔ او الس آ زور شاغا کہ او دشمن نا دروغ نا بیانیہ و منفی پروپیگنڈا غان پورو ہُشار مریر و ہچ ءُ دن ءُ مہم اسے نا بشخ جوڑ مفس ہرانا مسخت قومی ادارہ غاتے نزور کننگ مرے۔ وزیراعلیٰ پیدوار کرے کہ اگہ حکومت نا کنڈ آن کہول اسے آ بے پرواہی یا ردینک اس مسنے تو اودے منسا اودے چٹفنگک و زہمی خاہوت آتا وس انا کچ آ کمک ءِ پک کننگک۔ میر سرفراز بگٹی پارینے کہ بلوچستان اپیکس کمیٹی نا دیوان اٹ وزیراعظم پاکستان و فیلڈ مارشل سید عاصم منیر نا ساڑی گری ٹی بھلو فیصلہ کننگانے ہرافتیا پورو عملدرآمد ءِ المی جوڑ کننگک۔ او پارے کہ وزیراعلیٰ بلوچستان و چیف آف بگٹی نا وڑ اٹ ای زہمی خاہوت آتتون کننگوک کل قول تا پورو کننگ نا پابند اُٹ۔