ملک اٹی تربیلا و منگلا غان پد ہچ ءُ بھلو ڈیم اس جوڑ متنے، چیئرمین واپڈا

واٹر اینڈ پاور ڈیولپمنٹ اتھارٹی (واپڈا) نا چیئرمین محمد سعید پارینے کہ پاکستان ءِ دیر انا سیکورٹی کن سنجیدہ ءُ کوشست آتا گرج ءِ‘ ملک اٹی تربیلا و منگلا غان پد اسہ ڈیم اس ہم جوڑ متنے‘ وخت اس کہ بھارت پنچ ہزار ڈیم جوڑ کرینے۔ سینیٹ نا قائمہ کمیٹی آبی وسیلہ نا دیوان سینیٹر جام سیف اللہ خان نا کماشی ٹی پارلیمنٹ ہاؤس اٹی اڈ ہلک۔ کمیٹی ءِ پاننگا کہ خیبر پختونخوا ودیکاری تا 227 ہند آتا نشاندہی کرینے ہرافتیان بیرہ 18 ہند آتا سیٹلائٹ فوٹو ہلنگ مسنے وخت اس کہ پنجاب 2737 ہند آتا رپورٹ کرینے۔ چیئرمین کمیٹی نوکاپ نا پیش گوئی و دریابی نظام اٹی پوسکنوڑ ٹیکنالوجی نا کاریم اٹ اتنگ نا گرج آ زور شاغا و پارے کہ پاکستان اٹی چناب دریاب آ واٹر اسٹوریج آتا تفنگ نا بابت خاص ءُ دیوان اس بٹنگ انگے، انڈس واٹر ٹریٹی نا چاگڑد اٹی آخبت نا آبی کوڑی تا تفنگ و قومی آبی سلامتی نا باندات آتیا کمیٹی نا خاص دیوان اٹی انڈس واٹر کمشنر، وزارت خارجہ، جہانی بینک، این ڈی ایم اے و فیڈرل فلڈ کمیشن ءِ ہم بٹنگ انگے۔