سخت انگا وخت اٹ ترک ایلم تے تنیا الیپنہ،محمد شہباز شریف

لاہور : وزیراعظم محمد شہباز شریف پارینے کہ پاکستان دا مشکل وخت اٹ ترک ایلم تا کمک کن ہچ پدی توپک تینے۔ داحالیت آتے ٹی ترکیہ ءِ اسُل تنیا الیپنہ، ترکیہ نا الس تون ہمدردی نا درشانی ءِ کینہ، اومیت کینہ ترکیہ زوت دا مشکل آن پیش تمک۔ داخیا ل آتا درشانی ءِ او جمعہ نادے آ ترکیہ نا زمی جمب آن زہمی تیکن کمکی گڑا تا راہی کننگ نا وکت آ لاہور بالی پٹ آ گپ وتران کرسا کرے۔ داوخت آ نگران وزیراعلیٰ پنجاب محسن نقوی، ترکیہ نا قونصل جنرل و این ڈی ایم اے نا چیئرمین اسک ہم ساڑی ئسر۔ وزیراعظم محمد شہباز شریف پارے کہ زمی جمب آن ترکیہ و شام اٹی ہزار آ قیمتی جان تے نسخان مس، ننا ایلم ملک ترکیہ و شام اٹی است ہسون زمی جمب ہرا بھسکاری تے کرے ہراڑان ہزار آ مخلوق ہرافتے ٹی بزرگ، ایڑھ، ایلم و چناک اوار ئسر اللہ غا سفارنگانو، و لکھ آ بندغ آک بے اُرا مسنو وخت اس کہ ہزار آ مخلوق ٹھپی ءُ، مخلوق بے سرو سامانی نا حالیت اٹی تینا دوست آتے پٹنگ اٹی ءُ۔ اوپارے کہ داخہ در بھسکاری ساڑی آ دور اٹی ننا خنک اسُل خنتنو، ترکیہ و شام اٹی ہر کنڈ آ است ہسون ندارہ خننگک، ننے پورو اومیت ءِ کہ ترکیہ نا الس تینا لیڈر صدر طیب اردگان نا کماشی ٹی دا مشکل حالیت آتیان ضرور پیش تمرہ و ہندا رداٹ شام انا الس ہم دلیری اٹ حالیت آتا مقابلہ ءِ کرسا مشکل آتیان پیش تمرہ۔ وزیراعظم پارے کہ داوخت آ پاکستان نا 22 کروڑ الس ترکی نا ایڑھ و ایلم تتون تفوک ءُ و اوفتا غم اٹی بریبر نا شریک ءُ، ترکیہ ٹی زمی جمب آن پد ای دمدستی وڑاٹ ترک صدر رجب طیب اردگان ءِ فون کریٹ و پاریٹ پاکستان نا الس نمتون ہم کوپہ سلوک ءِ، و اودے ہروڑنا کمک نا باوری کرفین، پاکستان ترکیہ ءِ وخت اس ہم داحالیت آتیٹی تنیا الیپک۔ محمد شہباز شریف پارے کہ پاکستان نا ترکیہ تون بھاز متکن ءُ تعلقداری ءِ، پاکستان اٹی 2005 نا زمی جمب اٹی کم و ود اسہ لکھ بندغ زوال کریر و ہرکنڈ آ بھسکاری ئس وخت ا س کہ 2010 نا بدترین نوکاپ اٹی ترکی نا صدر طیب اردگان تینٹ پاکستان آ بس و اوڑتون اوار اونا اُرائی ہم ئس، دا نوکاپ اٹی ترکیہ پاکستان اٹی خلق انا خلق جوڑ کرے و پوسکن ءُ ہسپتال جوڑ کرے و ترکی نا الس و صدر ہمووخت اسکان رابطہ ءِ برقرار تخار ہراتم اسکان پاکستان ناآخیریکو بندغ تینا اُراٹی دُوارہ بحال متو، ہمووخت آ ترکیہ نا خاتون اول ترکی نا سخی و پوریاگر آتیان پاکستان نا مالی کمک کن خواست کرے و تینا قیمتی ہار ءِ ہم عطیہ نا وڑاٹ پیش کرے۔ اوپارے کہ ساڑی آ زمی جمب اٹی پاکستانی حکومت و الس ترک ایلم تتون ہم کوپہ سلوک ءُ و نن تینا وسیلہ غاتے ٹی رہینگسا ترکی الس نا وس انا کچ آ کمک کینہ محمد شہباز شریف پارے کہ ساڑی آ نوکاپ اٹی ہم ترکیہ پاکستان نا پبی کمک ءِ کرے و ننے ہم ترکیہ و شام انا ایلم تا کمک ءِ برجاتخوئی ءِ۔ ہرادے ترکیہ ٹی زمی جمب بس ہمودے تینا ایلم تا کمک کن پاکستان آرمی و ریسکیو نا ٹیم تے راہی کننگا۔

(اے پی پی)