افسر آتا جند برجا شونداری کاریم تا چاروکی، وخت آ پوروی ءِ پک کیر،ڈپٹی کمشنر صحبت پور

ڈپٹی کمشنر صحبت پور فریدہ ترین نا کماشی ٹی ڈسٹرکٹ ایجوکیشن گروپ نا اسہ اہم و جم دیوان اس اڈ ہلک، ہراٹی محکمہ تعلیم و ایلو تعلقدار محکمہ غاتا افسر آک بشخ ہلکر۔ دیوان اٹی مچ آ ضلع ٹی تعلیمی بشخ انا جم حالیت، پیش بروک آ ویل و تعلیم نا آب اٹ گچینی کن چندی باندات آتیا خوڑتی اٹ جاچ ہلنگا۔ دیوان نا وخت آ سرکاری تعلیمی ادارہ غاتیٹی برجا شونداری ڈٹ، خاص وڑاٹ بی ایس ڈی آئی (BSDI) نا رِد اٹ چھٹی تیٹی مروک تفوئی کاریم تا پیش رفت نا جاچ ءِ ہلنگا۔ دا ہیت آ زور شاغنگا کہ کل شونداری سرجز آتا بھرمی چاروکی ءِ کننگے و پک کروک وخت اٹ اوفتا پوروی ءِ پک کننگے، تانکہ تعلیمی ادارہ غاتا ملنگ آن مست کل المی آسراتیک پورو مریر و طالب علم آتے ہچ ءُ وڑ اسے نا خواری مون تروک مف۔ ڈپٹی کمشنر تعلقدار افسر آتے پارت کرے کہ او برجا شونداری کاریم تا تینٹ چاروکی ءِ کیر و دا ہیت ءِ پک کیر کہ تفوئی ڈٹ آک آب انا رِد اٹ و وخت آ پورو مریر۔ او دا ہیت آ ہم زور شاغا کہ طالب علم آتے آب اٹنگا تعلیم نا فراوانی کن کل ساڑی وسیلہ غاتے کاریم اٹ اتنگے و اسکول آتیٹی تعلیمی چاگڑد ءِ پین جوان کننگے۔ دیوان اٹی پی ٹی ایس ایم سی (PTSMC) نا رِد اٹ پوسکن تفوک کلاس روم تا ہم جاچ ءِ ہلنگا۔ڈپٹی کمشنر پارت کرے کہ کل ڈٹ آتے پک کروک وخت اٹی پورو کننگے و تفوئی کاریم اٹی آب ءِ پک کننگ کن پدریسہ مانیٹرنگ کننگے۔ دا وخت آ ڈپٹی کمشنر فریدہ ترین پارے کہ تعلیمی بشخ حکومت بلوچستان نا اولیت اٹی اوار ءِ۔ ضلع صحبت پور اٹی تعلیمی نظام نا جوانی، بنداوی آسراتی تا فراوانی و شونداری ڈٹ آتا وخت آ پوروی کن ضلعی انتظامیہ وس انا کچ آ گام گیج کننگ اٹی ءِ۔ او غٹ افسر آتے پارت کرے کہ دیوان اٹی مروک فیصلہ غاتیا دمدستی و بھرمی عملدرآمد ءِ پک کننگے و پیش رفت نا بابت باقاعدگی اٹ رپورٹ آتے جمع کرفنگے تانکہ تعلیمی نظام ءِ پین سوگو، بھرمی و فعال جوڑ کننگ مرے۔