آئین پاکستان نا اہم انگا بشخ و تاریخ آتے تعلیمی نصاب اٹ اوار کننگ نا فیصلہ

اسلام آباد: بنجائی وزیر تعلیم رانا تنویر حسین پارینے کہ شاری تے پاکستان نا آئین نا بابت پورو آگاہی فراوان کننگ نا گرج ءِ، دا رداٹ آئین نا اہم بشخ و تاریخ ءِ دمدستی وڑاٹ تعلیمی نصاب اٹ اوار کننگ اُن۔ اوآئین پاکستان نا 50 می سال دے آ قومی خبررساں ادارہ اے پی پی تون خصوصی گپ وتران کرسا پارے کہ آئین پاکستان نا 50 می سال دے ءِ اڈتننگ بھاز ستاکڑزک و او مچ آ قوم ءِ مبارکبادی ایتک۔ اوپارے کہ آئین بھاز مقدس و اہم ءُ دستاویز اس مریک ہرا ملک انا نظام ءِ چلیفک و شاری تا حق انا رکھ ءِ کیک، اوپارے کہ شاریک خاص وڑاٹ پوسکن آ چین ءِ آئین پاکستان نا بابت پورو وڑاٹ آگاہی فراوان کننگ نا گرج ءِ تانکہ اوفتے تینا حق و فرض انا درک مرے۔ بنجائی وزیر پارے کہ آئین پاکستان نا اہم بشخ و تاریخ ءِ قومی تعلیمی نصا ب اٹی اوار کننگ نا بابت حکمت عملی اس طے کننگانے، ننے دادے 23 مارچ آ نصاب نا بشخ جوڑ کروئی ئسک ولے گڑاس ہم قومی اختہ ئی تا سوب آن دادے برجاتُو اٹی اوار کینہ۔ اوپارے کہ نن خوانہ کہ چناتے تینا حق و زمواری تا بارواٹی آگاہی مرے۔ بنجائی وزیر پارے کہ آئین اتون ہی ملک اس تینا نظام ءِ چلیفنگ کیک۔ داٹی ساڑی آ خواست آتا رداٹ اسہ طے مروک وڑوڈول اسے نا کمک اٹ جوان ترمیم کننگک تانکہ اودے گچین آن گچین جوڑ کننگ مرے۔ اوپارے کہ نن دستور ءِ عملی وڑاٹ پورو نافذ کننگ نا عزم تخنہ۔

(اے پی پی)