وزیر خزانہ گچین کاری خڑچ آتا بل ءِ قومی اسمبلی ٹی پیش کرے

اسلام آباد : بنجائی وزیر خزانہ سینیٹر اسحاق ڈار پنجاب و خیبرپختونخوا اسمبلی تا گچین کاری نا خڑچ آتا بل ءِ قومی اسمبلی ٹی پیش کرے‘ اسپیکر قومی اسمبلی راجہ پرویز اشرف بل ءِ تعلقدار کمیٹی آ راہی کرے۔ وزیر خزانہ پارے کہ کابینہ دا ایوان نا سپریم کورٹ نا بابت منظور کروک قرار داد نا رد اٹ گچین کاری خڑچ آتا بل ءِ قومی اسمبلی ٹی اتنگ نا فیصلہ کرینے‘ داسہ دا ایوان ءِ فیصلہ کروئی ءِ کہ دا پیسہ غاتے الیکشن کمیشن ءِ تننگے یا آخا۔ دوشنبے نا دے قومی اسمبلی نا دیوان اسپیکر قومی اسمبلی راجہ پرویز اشرف ناکماشی ٹی اڈ ہلک‘دیوان اٹ بنجائی وزیر خزانہ سینیٹر اسحاق ڈار پارے کہ سال است مست ہراتم سلیکٹڈ حکومت ءِ کشنگا تو ننے بھس مروک زرگزران میرات اٹ رسینگا و زرگزران بھس مننگ نا دنگ آ ئس‘ ننے آن مست اناک زرگزران ءِ بھس کریسر‘ ننا اولیکو چیلنج ملک ءِ ڈیفالٹ آن بچفنگ ئس‘ بروک آ ریسہ ملک ءِ شونداری نا کسر آ روان کروئی ءِ‘ سازشیک داسہ ہم ملک انا برخلاف سازش کننگ اٹی ءُ‘ ہراتم ملک ءِ دیوالیہ کننگ کتوس تو او ملک اٹ آئینی تنکی ودی کریر‘ دا وڑ انا بندغ آک ملک انا راہشون پاننگ مفسہ ہرافک ملک دشمنی کننگ اٹی ءُ۔

(آن لائن)