شونداری کاریم تا وخت آ پوروی آن شونہالی بریک، علی اکبر بلوچ

کوئٹہ : سیکرٹری مواصلات و تعمیرات علی اکبر بلوچ پارینے کہ شونداری ڈٹ آتا وخت آ پوروی آن صوبہ ٹی شونداری و شونہالی بریک۔ او پارینے کہ کوئٹہ شار اٹ برجا انگا کل شونداری ڈٹ آتے وخت آ پوروی آن کوئٹہ شار انا زیبائی ٹی پین ودی بریک۔ دا خیال آتا درشانی ءِ صوبائی سیکرٹری مواصلات و تعمیرات کوئٹہ شار اٹ برجا انگا جتا جتا شونداری ڈٹ آتا دورہ ءِ کرسا پارینے کہ دا وخت آ چیف انجینئر ڈیزائن سجاد بلوچ آن بیدس محکمہ مواصلات و تعمیرات نا انجینئر افسر آک ہم ساڑی ئسر۔ سیکرٹری مواصلات و تعمیرات پارینے کہ برجا انگا شونداری ڈٹ آتا وخت آ پوروی ءِ پین جوان کننگے۔ برجا انگا ڈٹ آتیا مدانی و آب آ ہچ ءُ ڈیوالئی اس سگپنہ۔ او پارینے کہ برجا انگا شونداری ڈٹ آتے وخت آ پورو کننگے۔ دا ڈٹ آتا پوروی آن کوئٹہ شار و ہیب کیب اٹ شونداری و شونہالی نا اسہ پوسکن ءُ دور اس بنا مریک۔ شاہراہ تا جوڑی و انفراسٹرکچر نا جوانی آن اُلس و صوبہ غا ہچ ءُ جوان ءُ اثر اس تمک۔ او پارینے کہ جوان و سوگو مواصلاتی نظام نا صوبہ نا زرگزرانی راجی شونداری ٹی اہم ءُ کڑد اسے۔ مواصلاتی نظام اٹ جوانی آن صوبہ نا کل ضلع غاتیٹی شونداری و شونہالی بریک۔ او پارینے کہ ساڑی صوبائی حکومت اولیت ایتک کہ صوبہ ٹی شونداری ڈٹ آتا جال اس شاغنگک۔ او مستی پارینے کہ صوبائی وزیر مواصلات و تعمیرات سردار عبدالرحمٰن کھیتران نا پارت ءِ کہ صوبہ ٹی برجا انگا شونداری ڈٹ آتیٹی ہچ ءُ مدانی اس بایدے مف۔ کل شونداری ڈٹ آتے وخت آ پورو کننگے۔ سیکریٹری مواصلات و تعمیرات شونداری ڈٹ آتیا کاریم نا ترندی ءِ پین جوان کننگ نا پارت کرسا پارینے کہ ڈٹ آتے زوت اس پورو کننگے تانکہ کوئٹہ شار انا اپلس دا ڈٹ آتیا فائدہ ہرفنگ کے۔

(خ ن)