احساس کیش گرانٹ جوانی ونزوریک
رحمان حمید
Get real time updates directly on you device, subscribe now.
کورناوائرس ہرادے کووِد نائنٹین نا پن ہم تننگانے، دا اسہ موذی ءُ مرض اسے ہراکہ گدروک آ سال 2019ءنا دسمبر اٹی چین نا ووہان شار آن بنا کرے، دا موذی آ دین دا وخت اسکان تیویٰ دنیا ءِ پلویڑکرینے۔
کہ دا وخت آ ہفتاد لکھ بندغ دا مرض نا گواچی مسنو۔ و اینو نا دے اسکان دا مرض آن زوال مروک آ بندغ آتا کچ چار لکھ آن زیات ءِ۔
ایلوملک آتا وڑ داڑے پاکستان اٹی ہم دا دین آن بھلو کچ اسے ٹی مخلوق زہمی مسنے زہمی مروک آتا دا وخت اسکان نا کچ لکھ آن گدرینگانے۔ و پاکستان اٹی دا مرض آن کہوک آ بندغ آک اِرا ہزار آن زیات ءُ۔
دا مرض انسانی راج ءِ ہراجانی زوالی و بیرانی تا گواچی کرے ہموڈول تیویٰ جہان نا زرگزران (معیشت) ءِ ہم تباہ کرے کہ غٹ دنیا نا بھلا بھلا کاروباری آ مارکیٹ، بازار، کارخانہ وکمپنیک داڑن زہمی مرسا ارب آ ڈالر آتا نسخان نا شیف اٹ ہنار۔
ہر وڑ انا کاروبار و مارکیٹ آک بند مسر۔ دافتےان مخلوق وخاص کر دیہاڑی آ کاریم کروک آ بندغ و پوریاگرک بھاز زہمی و فریشان مسر۔
پاکستان اٹی ہم مسہ تواسکان لاک ڈاﺅن اس خلنگا، ہراڑان داجاگہ نا پوریاگر تپہ نیاڑی نرینہ غاک تینا گزران کن بیخی زیات فریشان مسر۔
ہندا پوریاگر تا فریشانی ءِ ہُرسا داڑے پاکستان اٹی ”احساس کیش گرانٹ“ نا پن اٹی اسہ پروگرام اس بنجائی حکومت نا پارہ غان دا ڈول درستی راستی کرفنگا کہ ہمو مخلوق ہرادے سرکاری نوکری اف یا پنشن اس ہلنگ اف، ہرافک لاک ڈاﺅن و روزگار نا بندی گری آن زرگزرانی پڑ آ زہمی مسنو، اوفک موبائل آن 8171 آ اسہ میسج اس کرسا دا پروگرام اٹی اوار مریر، ہرافک حقدار ئسر، تو ہندا پروگرام نا وسیلہ ٹی اوفتے دوانزدہ ہزار روپئی تننگک۔
پوریاگر نرینہ ونیاڑی تے کن یخین اٹ دا اسہ گچین ءُ مالی /گزرانی کمک اس مس، ہراڑان چندی بندغ آتا منہ دے کن اُرانا گرج انا گڑا تا ہلنگ نا فریشانی زرس مر مس۔
پاکستان اٹی ایلو صوبہ غاتتون اوار داڑے بلوچستان و پدا نوشکے نا ضلع ٹی ہم دا پروگرام نا بنا کننگا۔ ہرانا رد اٹ شش سد آن زیات حقدار آ غریب نیاڑی و نرینہ غاتے احساس کیش گرانٹ پروگرام نا تہٹی پیسہ تننگا۔
ولے دا پروگرام نا خوڑتی جاچ وخت آ داٹی جوانی تو ارے، بڑز سند آ چندی نزوریک ہم مون آ بسر۔ اولی نزوری دا کہ داپروگرام اٹی حقدار آتا رجسٹریشن نا اسٹ انگا وڑ موبائل نیٹ ورک ئس۔ داسہ بلوچستان اٹی دن ءُ چٹ بھاز جاگہ ارے ہراڑے داسکان موبائل نیٹ ورک نا آسراتی اف، ہندا وڑ نوشکے ٹی ہم بے حساب خلق وپہوال آتیٹ داسکان موبائل نیٹ ورک نا آسراتی اف۔ دا علاقہ تیٹ موبائل نیٹ ورک نا آسراتی مفننگ نا اسہ بھلو سوب اس دا علاقہ غاتا پاک اوغان سیم انا پٹی آ مننگ نا سوب ءِ سیکورٹی گڑتی تا سوب دا جاگہ غاتیا موبائل نیٹ ورک نا آسراتی تیان مر تخنگانے۔
دن کہ یونین کونسل کیشنگی نا بیدس اِرا خلق آن ایلو جاگہ غاتیا موبائل نیٹ ورک نا آسراتی اف۔ ہنداوڑ نوشکے نا یونین کونسل ڈاک وانام بوستان نا تیویٰ خلق آتیٹ داسکان موبائل نا آسراتی کاٹم آن ہچ اف۔ مل واحمدوال یونین کونسل نا بھاز آ خلق آتیٹ نیٹ ورک اف۔
دا خلق آتا کچ پنجا غان زیات ءِ۔ وخت اس دا خلق آتیٹ کہ موبائل نیٹ ورک اف گڑا داجاگہ نا حقدارنیاڑی نرینہ غاک احساس کیش گرانٹ پروگرام اٹی رجسٹر امر مننگ کریرہ؟
مروئی تو دا ئس کہ داخلق آتیٹ ساڑی حقدار آتسکان پین ڈیوائس ولوپ اسے نا کمک اٹ دافتا حقدار آتسکان رسینگ گیگ ءِ پک کرسا اوفتے رجسٹر کننگوسس۔ داسہ دا خلق آتا حقدار آک دا پروگرام اٹی تینے وڑ انا وڑاسے ٹی رجسٹرڈ کرفینو، بھاز آک تا پیسہ ہم ہلکنو ولے اوفتا کچ بھاز کم ءِ۔
ایلونزوی وبھلا ویل دا پروگرام نا دامس کہ مچ آ ضلع ٹی پیسہ بشخنگ نا اسہ جاگہ اس پک کننگاسس ہرا کہ نوشکے بازار نا بھلا اسکول بوائزماڈل ہائی اسکول ئس۔
داڑے ہم بازار نا خڑک انا کلی تیان بروک آ حقدار آتے کن آسراتی و مر آن بروک آتے کن بھلو خواری اس ئس۔ او دُن کہ مُر خلق آتیان دنکہ زار ءُ، عیسے چاہ، قبول، شکراپ، نصیرآباد، ہزارجفت، خرینہ، مل، احمدوال، کیشنگی آن بروک آ خاص کر پیر انگا ناجوڑ و معذور آ نیاڑی نرینہ غاتے کن بھلو خواری اس ئس۔ اسٹ دادے تیٹ لوکل گاڈیک بند ئسر، ارٹمی دا خلق آتیٹ لوکل گاڈیک ہم کچ اٹ مریرہ۔ کل آن بھلا خواری و فریشانی دا وخت آ حقدار آتیکن دا مسکہ کہ اوفک ہفتاد میل مُر آن سفر کرسا داڑے پیسہ ہلنگ کن بسرہ تو اوفتے دا پارسا نااومیت کننگاکہ کہ نما بائیومیٹرک شست نا ویری فکیشن سہی اف۔ اودے تیٹ نادرا آفس ہم بند ئس، داسہ بندغ آتے کہ بھلو زحمت و خواری اس ئس کہ اوفتے ٹی بھاز کم خوانندہ ءُ بندغ مسکہ کہ داوڑ انا ٹیکنیکل ویل ءِ پہہ مروسر، ایلو خواری سفر نا ئس کہ بھاز کم بندغ آتے نوشکے بازار نا ایب کیب اٹ درستی اس مہمان نا وڑ خوندی کروسس، ولدا داہم سما الو کہ اونا دا ہور والا ویل ہراوخت ایسر مرو۔ دنکہ اسہ حقدار جنوزان نیاڑی اس ہرانا اُرا نوشکے جمال آباد اٹی ءِ اوپارے کہ تُو اسے آن زیات ءِ کن کن میسج بسنے کہ نی کڑزسہ، ہن تینا پیسہ غاتے ہل/ ای ہراتم احساس والا تاپیسہ بشخنگ نا جاگہ غا ہناٹ تو کنے دا پارسا پیسہ تتوس کہ نا شَست ءِ ننا بائیومیٹرک سسٹم ہرفنگ اف۔ ای نادرا غا ہناٹ اوفک کنا شست ءِ ویری فائے کریر پدی پیسہ ہلنگ کن ہناٹ تو اوفک پاریر داسکان نا شَست والا ویل ارے۔
ہندا وڑ حوال اس ننے خلق مینگل نا اسہ نرینہ حقدار اس ہم تس۔
داڑکن دُن مروسس کہ اسہ ہند اسے نا جاگہ غا ضلع ٹی پیسہ بشخنگ کن ہر یونین کونسل اٹی اسہ جاگہ اس پک کننگوسس گڑا مخلوق خاص وڑ اٹ ناجوڑو معذور آ زالبول ونرینہ غاتے داخس خوار مروئی تمتوکہ۔
داپروگرام اٹی ایلو نزوری دا پاش مس کہ داٹی ہچ ءُ مخصوص ءُ تپہ اسے کہ خاص ءُ کوٹہ اس تخنگتویسس۔ دن کہ اقلیت آک، معذور آک، ہجڑاک ایلو جنوزان آک دافتے کن ہچ ءُ خاص ءُ کوٹہ اس داپروگرام اٹی جتا پن کننگتویسس۔
بایدے دن مروسس کہ ہرضلع اٹی اسیکا اسسمنٹ اس دا رداٹ کننگوسس کہ داڑے اقلیت آک اخس ءُ، ہندن معذور و جنوز آک اخس ءُ، دا ہننگوسس کہ داضلع ٹی ہجڑا ارے یا اف۔ دا کل تپہ غاتے ہرسا ہرضلع ٹی دافتے کن مخصوص ءُ کوٹہ جوڑ مروسس۔
داپروگرام اس تو جوان ءُ ئس ولے دانا ہوم ورک او ڈول الو ہراوڑ مروئی ئس، ہنداڑان بھاز آ حقدار آک دا پیسہ غاتیان داسکان محروم سلیسر۔
ہندا وڑ ضلعی سند آ لاک ڈاﺅن نا وخت آ راشن بشخنگ نا وڑ و ڈَول اٹی ہم خننگاکہ داٹی ہم جوانی تون اوار بھا ز آ نزوریک مون آ بسر کہ راشن تا رجسٹریشن کن تیویٰ ضلع ٹی اسٹ انگا ڈپٹی کمشنر نا دفتر پن کننگاسس داسہ مر علاقہ غاتا حقدار آک داڑے سرمننگ آن گشیتری سلیسر کس ءِ اگہ بندغ اس ئس تو اونا پن درج مس اودے راشن ملا ولے کس ءِ اگہ بندغ الو تو اوڑکن ہچ اس متو۔
خواست داگڑانا ءِ کہ دن انگا وخت آ ہراسہ علاقہ نا ہراسہ پڑ آن جاچ ہلنگاسس اوڑکن ہمووڑ پروگرام ءِ شون تننگے، تاکہ کل حقدار آک اوڑسکان سرمننگ کیر۔